get link

(ကရုဏာရှင် အကြင်နာရှင်) ကရုဏာ الرَّحْمـَنِ အရ်ရဟ်မန်နှင့် အကြင်နာ الرَّحِيم အရ်ရဟီးမ် ဆိုသော စကားလုံးများမှာ သနားကြင်နာမှု အဓိပ္ပါယ်ကို ဆောင်သည့် ရင်းမြစ် ဝေါဟာရ رَحمـتَ ရဟာမတ် တစ်လုံးတည်းမှ ဆင့်ပွားလာခြင်း ဖြစ်၍ ကျမ်းတော်တွင် မူရင်း ဆင့်ပွား စကားလုံးပေါင်း ၃၃၉ ကြိမ် ပါဝင်သည်။ الرَّحْمـَنِ အရ်ရဟ်မန် သည် စကြာ၀ဠာ ခပ်သိမ်းကုန်နှင့် သဗ္ဗလုံးစုံအား ဆင့်ကဲပြည့်စုံ ဖြစ်တည်လာစေရန် ပြဌာန်းပေးသော ကရုဏာတော် ဖြစ်၍ الرَّحِيم အရ်ရဟီးမ် မှာ ထိုဖြစ်တည်လာသော အရာ အားလုံးအတွက် ခံစား၊ စံစားရစေရန် ဘုံ အဆင့်ဆင့်ကို ဆက်လက် ပြဌာန်း ဖြစ်တည်ပေးသည့် ကြင်နာမှုကို ဆိုလိုသည်။

(ပရမတ်ဘုရားရှင်၏ ) اللّه အလ္လာဟ် ဆိုသည့် ဂုဏ်တော်သည် ကျမ်းတော်တွင် ၂၆၉၉ ကြိမ်နှင့် اللَّهُمَّ ဟူသည့် ဆုတောင်း စကားလုံး အနေဖြင့် ၅ ကြိမ်- စုစုပေါင်း ၂၇၀၄ ကြိမ်ပါဝင်သည်။ အလ္လာဟ်၏ ဂုဏ်တော်အား မူရင်း အဓိပ္ပါယ်မှ တိမ်းပါးသွားမည်ကို စိုးရိမ်မကင်း ဖြစ်သောကြောင့် ဆရာတော်ကြီး အများစုက ဘာသာပြန်ခြင်းမှ ရှောင်ကြဉ်ကြလျှက် မူရင်း အသံထွက်အတိုင်း အလ္လာဟ် ဟု သာ မွေးစားဝေါဟာရ အဖြစ် သုံးစွဲကြပေသည်။ ကျွန်ုပ် အနေဖြင့်လည်း မူရင်းအနှစ်သာရ ပျောက်ပျက် သွားမည်ကို မလိုလားပါ၊ သို့သော် ဤနေရာ၌ ရှင်းပြန်ရန် လိုပေလိမ့်မည်၊ မရှင်းပြပြန်က အစ္စလာမ်တို့ ယုံကြည်လက်ခံသော အလ္လာဟ် ဆိုသည်ကို ခရစ်ယာန်များ ပြောဆိုသော ထာ၀ရဘုရားနှင့် အတူတူပင် ဖြစ်သည်ဟုလည်းကောင်း၊ ကောင်းကင်ဘုံရှိ ရာဇပလ္လင်ပေါ်တွင် စိုးစံနေလျှက် လူ့ပြည်လူ့ရွာအား မိန့်ခြွေ လမ်းညွှန်နေသည့်၊ မြန်မာတို့ နားလည်ထားသော နတ်ဘုရားကြီး ပုံစံမျိုးဟုလည်းကောင်း၊ အရာရာကို “ဥုံ-ဖွ” ဖြစ်စေဟု ပဉ္စလက်ဆရာကြီး ကဲ့သို့ ဖန်ဆင်းလေ့ရှိသော ဣဿရ ဖန်ဆင်းရှင် အဖြစ်လည်းကောင်း နားလည်ထားကြသူများမှာ ထိုသို့ လွဲမှားသော အထင်အမြင်ထဲမှ ကျွတ်လွတ်နိုင်ရန် အခွင့်အရေး နည်းပါးလှပေသည်။ အစ္စလာမ် သာသနာက လက်ခံယုံကြည်သော အလ္လာဟ် ဆိုသည်မှာ “ပညတ်ဖြစ်တည်မှု ခန္ဓာကိုယ်” ပညတ္တိကာယ မဟုတ်ပေ။ ပရမတ္ထကာယ “ပရမတ်အဖြစ်” ရှိနေပြီး မံဿစက္ခု (သာမန် မျက်စိ)ဖြင့် သိမြင်ခံစားနိုင်မှုမှ ကင်းလွတ်ပေသည်။ ထိုသို့ ပရမတ်အဖြစ် တည်ရှိသော ပရမတ်ဘုရားရှင် အလ္လာဟ် သည် သဗ္ဗညုတ ဉာဏ်စဉ်တော်၏ မူလအစ ဇစ်မြစ်တော် ဖြစ်ပေသည်။ မဟာယန ဗုဒ္ဓဘာသာဝင်များ လက်ခံသော ဓမ္မကာယ “မူလဇစ်မြစ် တရားကိုယ်” ဆိုသည်နှင့် နီးစပ်မှု ရှိသော်လည်း မဟာယနတို့၏ အယူအရ ဓမ္မကာယသည် လောက လူသားတို့အား ကယ်တင်ရန် အလို့ငှာ သံဘောဂကာယ (ဗောဓိသတ္တ) “လူသားဘုရား” အဖြစ် ခံယူကာ လောကသို့ ကြွလာသည်ဟု ဆိုထားသဖြင့်၊ လူသား ဘုရား အဖြစ် လောက၌ ဝင်စားခြင်း မရှိသော ပရမတ်ဘုရားရှင် အလ္လာဟ်အား ဓမ္မကာယဟု ဘာသာ ပြန်ဆိုလျှင် အဓိပ္ပါယ် နီးကပ်မှု အားနည်း နိုင်မည် ဖြစ်သည်။ (၁၁၂း၄ တွင်ကြည့်ပါ၊) အလ္လာဟ် ဟူသည်မှာ သော ဘဂ္ဂဝါ သယမ္ဘူတိ – အကြင်မြတ်စွာဘုရားသည် အလိုလို ဖြစ်တော်မူ၏- ဟူသော ဂုဏ်တော်နှင့် သဘောသဘာ၀ အလျှောက် အလိုလို ဖြစ်တည်နေတော်မူ၍- ပညတ္တိကာယ မဟုတ်သော ပရမတ်ဘုရားရှင် ဖြစ်သည်ဟု ထေရဝါဒ ဗုဒ္ဓဘာသာ၌ ရင်းနှီးကျွမ်းဝင် ပြီးသား မြန်မာများအတွက် အောက်ပါ ကျမ်းညွှန်းများအရ အနီးစပ်ဆုံး နားလည်ခံစားနိုင်ပေမည်။ နိုင်ငံကျော် ဓမ္မစေတီ ဆရာတော်ဘုရားကြီး ရေးသားတော်မူသော သမစိတ္တ ဘာသာကျမ်း သံဃာစစ်တမ်း အလင်းကျမ်း သံဃာဟုတ်မဟုတ် မေးခွန်းထုတ်ကျမ်း (ဂန္ဓမာပုံနှိပ် တိုက်မှထုတ်ဝေသည်)တွင် “လူကဖြစ်သော ဥပဇာဗုရား၊ ပုဂ္ဂလဓိဌာန် ဗုရားတို့ကို ပါယ်၍ ဗုဒ္ဓါန ဗုရားအစစ် ဓမ္မဓိဌာန် သဗ္ဗညုတဉာဏ် နိယတ အမြဲဗုရားကို ပြဦးအံ့။ လောကေ၊ လောက၌၊ ဧကောရေ၀၊ တဆူသာလျှင်၊ ဥပ္ပဇန္တိ ဖြစ်ကုန်၏၊ ကိံကရဏံ အဘယ်ကဲ့သို့နည်း ဟူမူကား၊ မဟန္တံ ကြီးမြတ်သော သဗ္ဗညုတဉာဏံ၊ သဗ္ဗညုတဉာဏ်ကို အစိုးရသော ဓမ္မဓိဌာန် နိယတ အမြဲဗုရားသည်၊ ဂုဏာနံ ဂုဏ်ပေါင်းတကာတို့၏ တည်ရာဖြစ်သော၊ ဧကန္တ ထိုသဗ္ဗညုတအရှင် နိယတသခင် တဆူတည်း အမြဲဗုရားသည်သာလျှင် ဟောတိ ဖြစ်၏၊ ဣတိ ဤသို့ ဂဏှိတဗ္ဗံ ယူမှတ်အပ်၏။” ဟူ၍လည်းကောင်း၊ သုံးဆယ်မြို့ ဘုရားဒကာ ဦးလူငယ် ရေးသားသော သဗ္ဗညုတ စိန္တာမဏိကျမ်း စာမျက်နှာ (၂)တွင် “သဗ္ဗညုတ ဘုရားသခင်သည် အမိမရှိ အဘ မရှိ ကိုယ်ထက်မြတ်သော သူမရှိ၊ ပါရမီဆယ်ပါးကို မဖြည့် ဒါန သီလ ဘာ၀နာတို့ကို မပြုလုပ်ဘဲ၊ အလိုလို ဖြစ်တော်မူကြောင်း၊ သက်သေကား-သယံ၊ အလိုလို၊ ဘူတံ၊ ထင်ရှား၊ ဇာရတိ ဖြစ်တော်မူ၏၊ သယံအဘိညာယ ကာရဿေရန္တိ ဆရာမိဘကင်း၍ ဖြစ်သော ပါဠိသက်သေ၊ သဗ္ဗညုတ ဘုရား တဆူတည်း ဖြစ်ကြောင်း သက်သေခံ ပါဠိကား သာရတ္တ သင်္ဂဟကျမ်း၌-ဗုဒ္ဓါနုပန၊ ဧကောရေ၀ ဥပ္ပဇ္ဇန္တိ၊ ကိံကရဏံ၊ မဟံန္တံတာရ၊ သဗ္ဗညုတ ဉာဏ ဂုဏာနံ၊ မဟန္တံဟောတိ၊ ဧကံတံရေ၀၊ ဂဏှိတဗ္ဗံ။ ဗုဒ္ဓါနုပန ဘုရားမည်သည်ကား၊ လောကေ လောက၌၊ ဧကောရေ၀ တဆူတည်းသာလျှင်၊ ဥပ္ပဇ္ဇန္တိ ဖြစ်ကုန်၏၊ ကိံကရဏံ အဘယ်ကဲ့သို့နည်း ဟူမူကား၊ မဟန္တံ ကြီးမြတ်သော သဗ္ဗညုတဉာဏံ၊ သဗ္ဗညုတဉာဏ်တော်သည် ဂုဏာနံ ဂုဏ်တို့ ၏ တည်ရာဖြစ်သော၊ ဧကံတံ ထိုသဗ္ဗညုတဉာဏ် တဆူတည်းသာလျှင်၊ ဟောတိ ဖြစ်၏၊ ဣတိ ဤသို့ ဂဏှိတဗ္ဗံ ယူအပ်၏။” ဟူ၍လည်းကောင်း ဖေါ်ပြထားပေသည်။ထိုထေရဝါဒ ဗုဒ္ဓဘာသာ ဆရာတော်များ ရှင်းထားသည့် သဗ္ဗညုတ ဘုရားရှင် ဆိုသည်မှာ ပရမတ်ဘုရား ဖြစ်၍ လူသားပညတ်ဘုရား၊ ဥပဇာ ဘုရားများနှင့် မသက်ဆိုင်ပေ။ ထိုပရမတ်ဘုရားရှင်က လူသားအဖြစ် ဝင်စား၍ လောကသို့ ကြွလာတော်မူသည်ဟုလည်း မဟာယန ဗုဒ္ဓဘာသာ ကဲ့သို့ ခံယူမှုထားသည်ကို မတွေ့ရပေ။ လောကလူသားမှ ပွင့်ပေါ်သော ဘုရားများမှာ ထိုပရမတ်ဘုရားရှင်မှ ချီးမြှင့်သော ဉာဏ်စဉ်တော် ကိန်းဝပ်ခြင်းကို ခံရသည့် လူသားစင်စစ်များ (ဘုရားကပြားများ မဟုတ်) ဖြစ်ကြောင်းကို သဗ္ဗညုတ စိန္တာမဏိကျမ်း စာမျက်နှာ (၁၅)တွင် “ရှင်ဂေါဓမဘုရား သဗ္ဗညုတ ကိန်းအောင်း၍ ပွင့်တော်မူ သကဲ့သို့ အခြား စကြာ၀ဠာများမှာလည်း ရှင်ဂေါဓမ အရှင်မြတ်ကဲ့သို့ သဗ္ဗညုတ ကိန်းအောင်း၍ ပွင့်တော်မူသော ဘုရားပေါင်းကား အနန္တပင် ရှိချေမည်။”ဟု လည်းကောင်း၊ စာမျက်နှာ (၁၇)တွင် “မနိမဉ္ဇူ ဋီကာကျမ်း၌—သဗ္ဗညုတ ဉာဏဿ၊ သဗ္ဗညုတ ဉာဏ်တော်ကို ပတိလာဘ ရခြင်းကြောင့် တဿ ထိုခန္ဓာငါးပါး အစဉ်ကို ဗုဒ္ဓေါတိ ဘုရားဟူ၍ ပညတ္တတ္ထာ ပညတ်သည်၏ အကြောင်းကြောင့်တည်း”ဟု ဆိုထားပေသည်။ အစ္စလာမ် သာသနာတွင်မူ သဗ္ဗညုတ ဉာဏ်တော်ကို ရရှိသော ပုဂ္ဂိုလ်မြတ်တို့အား ပညတ်ဘုရား ဟူ၍ မခေါ်ဆိုပေ၊ ဉာဏ်စဉ်ဆောင် (ရစူလ်)၊ သတင်းတော်ဆောင်(နဗီ) များဟု ခေါ်ပေသည် (၂း၆၁)။ သို့သော် အစ္စလာမ် သာသနာက လက်ခံသော အလ္လာဟ် ဆိုသည်မှာ ထိုဆရာတော်ကြီးများ ရှင်းပြသော ပရမတ်ဘုရားရှင်နှင့် အနှစ်သာရခြင်း နီးကပ် နားလည်နိုင်ပေသည်။ (၂း၂၁ တွင် ကြည့်ပါ)

(ကပ်ကမ္ဘာအပါင်း၏ ကံကြမ္မာရှင် ) အလ်ဟမ်ဒို့ الْحَمْدُ ကို ဆရာတော်ကြီး အများစုက ချီးမွမ်းထောမနာပြုခြင်း ခံထိုက်မှုဟု ဘာသာပြန်ဆိုကြပေသည်။ ထိုသို့ ပြန်ဆိုခြင်းမှာ ဘုရားသခင်၏ နာမတော်များကို ဓမ္မတေးသွားအဖြစ် စပ်ဆိုပြီး ချီးမွမ်းထောမနာပြု ဝတ်ပြုဆုတောင်းလေ့ရှိသော ခရစ်ယာန်တို့၏ ဓလေ့ထုံးထမ်းကို အခြေခံ၍ ပြန်ဆိုခြင်း ဖြစ်ပေသည်။ အလ်ဟမ်ဒို့ الْحَمْدُ ၏ ရင်းမြစ် ح م د ဟမိဒ သည် သဒ္ဒါပုံစံကွဲ ၅ မျိုးဖြင့် ကျမ်းတော်တွင် ၆၃ ကြိမ်ပါဝင်သည်။ အနက်မှာ Praise, Eulogy သို့မဟုတ် Praise, Aim, upmost, exertion ဟူ၍ ဖြစ်သည်၊ (ကော်ဆမို- အင်္ဂလိပ် အရ်ဗီ အဘိဓာန်)။ အစ္စလာမ် သာသနာဝင်တို့သည် ပရမတ်ဘုရားရှင် (အလ္လာဟ်)၏ ဂုဏ်တော်များအား ချီမွမ်းထောမနာ ပြုနေယုံမျှဖြင့် ရောင့်ရဲနေကြခြင်း မရှိပေ၊ ပရမတ်ဘုရားရှင်အား ဝိဉာဏ စက္ခုဖြင့် ဖူးမျှော်နိုင်ရန်အတွက် ရည်သန် စူးစိုက်မှု၌ ပျော်ပိုက်ကြပေသည်။ အခြေခံအားဖြင့် ဆွလတ်ဟု ခေါ်သည့် မေတ္တာဓိဌာန်ပြုခြင်းကို နေ့စဉ်နှင့်အမျှ ငါးကြိမ်ကျ ဆောင်ရွက် နေရပေသည်။ ဤ မေတ္တာဓိဌာန်ပြုခြင်းကို ဘုရားရှိခိုးသည်ဟု အလွယ်တကူ ပြောဆို ကြသော်လည်း၊ ဘုရားရှင်အား ကြောက်ရွံ့သော ကြောင့် ဒူးထောက် ဦးချ ကန်တော့နေရခြင်း မဟုတ်ပေ။ (၂း၃ တွင် ကြည့်ပါ)။

(စီရင်မိန့်ချသည့်နေ့) ယောင်မက်ဒ်ဒီး يَوْمِ الدِّينِ ကို ကျမ်းတော်တွင် ၁၃ ကြိမ် ဖေါ်ပြသည်။ ဆရာတော်ကြီး အများစုက နောက်ဆုံးနေ့တော်ကြီးဟု ဘာသာပြန်ဆို ကြပေသည်။ ဤသို့ ပြန်ဆိုခြင်းသည် လုံး၀မှားယွင်းမှု မရှိသော်လည်း မြန်မာတို့ နားလည်ထားသော ဘာသာရေး ဝေါဟာရ အရ ပြည့်စုံ လုံလောက်မှုမှာ အားနည်း နေပေသည်။ နောက်ဆုံးနေ့တော်ကြီးဟု ဘာသာပြန်ဆိုသောကြောင့် လောကလူ့သက်တမ်း ကုန်ဆုံး၍ အနိစ္စရောက်ရ သောနေ့ဟု နားလည်မှု လွဲချော်နိုင်ပါသည်။ يَوْمِ الدِّينِ မှာ ယောင်းမွန် يَوْمِ “ရက်၊ ကာလ”နှင့် ဒီးန် الدِّينِ “သာသနာ၊ ဥပဒေ၊ ချမှတ်ထားသော စည်းကမ်း၊ ကျင့်ဆောင်မှု တစ်ခု၏ တန်ပြန်ခံရခြင်း” ဆိုသည့် ဝေါဟာရ နှစ်ခုကို ပေါင်းထားသော စကားလုံးဖြစ်၍ မိမိကျင့်ကြံသော လမ်းစဉ်၌ အန္တိမ ပန်းတိုင်ကို နှလုံး အကြည်ဓါတ်တွင်း ဆိုက်ရောက်သော ကာလကို ခေါ်ပေသည်။ ထို့ကြောင့် လူ့သားတစ်ဦး၏ သက်တမ်းအတွင်းတွင်လည်း ဖြစ်နိုင်၍ ခန္ဓာကိုယ် စွန့်လွှတ်ပြီးနောက်လည်း ဖြစ်နိုင်ပေသည်။ အစ္စလာမ် သာသနာဝင် အများစုက ဝိဉာည်တိုင်းသည် မိမိ၏ ကောင်းမှု ဆိုးမှု အလျှောက် စီရင်ချက်ချ ခံရမည်ဟု ယုံကြည်ပေသည်။ ဤကြားကာလများတွင် စီရင်ချက်ချ မခံရလျှင်သော်လည်း နောက်ဆုံး “ကပ်ကမ္ဘာများ ချုပ်ငြိမ်းသောနေ့၌ ဝိဉာဉ်တိုင်းသည် မိမိတို့ ပြုကျင့်ခဲ့သည့် ကုသိုလ်၊ အကုသိုလ် အလျှောက် စံစား၊ ခံစားရခြင်းကို သတ်မှတ်ခံရမည်”ဟု နည်းလည် လက်ခံထားပေသည်။?

(ကိုးကွယ်ပါ၏) နအ်ဗို့ဒို့ نَعْبُدُ ကျွန်ုပ်တို့ဝတ်ပြုပါ၏ ဟူသော စကားလုံးသည် عبد အဗဒ ဝတ်ပြုသည်၊ အမှုတော်ထမ်းဆောင်သည်၊ ကိုးကွယ်သည် ဟူသော ရင်းမြစ် စကားလုံးမှ ဆင့်ပွားလာခြင်း ဖြစ်သည်၊ အဗဒ ၏ မူရင်း အဓိပ္ပါယ်မှာ မိမိဆောင်ရွက်ရမည့် ဝန်တာအား ပုံမှန် ဖြည့်ဆည်းဆောင်ရွက်မှုကို ရည်ညွှန်းပေသည်။ ထို့အပြင် အစ္စလာမ် သာသနာ၏ ကိုးကွယ်ယုံကြည်မှု သဘောတရားတွင် လက်တွေ့လုပ်ဆောင်မှု သဘော ပါဝင်ပေသည်။ ဘုရားရှင်အား လူသားက ကိုးကွယ်သည် ဖြစ်စေ၊ မကိုးကွယ်သည် ဖြစ်စေ ဘုရားရှင်၌ ထိခိုက်နစ်နာမှု မရှိချေ။ လူသား အနေဖြင့်လည်း ကိုးကွယ် ပါသည်ဟု နှတ်မှ ဆိုယုံမျှဖြင့် အကျိုးထူးလာမည် မဟုတ်ပေ။ အလုပ် မပါသော အပြောကို အစ္စလာမ် သာသနာက အသိအမှတ် မပြုပေ။ ထို့ကြောင့် “အရှင့်ကိုသာ ကိုးကွယ်ပါ၏” ဆိုသည်မှာ အရှင်၏ ပညတ် ပြဌာန်းထားသော လောက နိယမနှင့် အညီ ဤလောက၌ ကျွန်ုပ်တို့သည် ကျင်လည် ကျက်စားပါမည်ဟု မိမိကိုယ်မိမိ သံဓိဌာန် ပြုခြင်းပင် ဖြစ်ပေသည်။ ع ب د ကို ကျမ်းတော်တွင် သဒ္ဒါပုံစံ ၆ မျိုးဖြင့် ၂၇၅ ကြိမ် ဖေါ်ပြထားသည်။

(၉) အစ္စလာမ် သာသနာဝင်များက ဤစကြာ၀ဠာ အနန္တ ကျင်လည်ကျက်စားနိုင်ရန်၊ စကြာ၀ဠာများ အတွက် အလ္လာဟ်အရှင်၏ ပြဌာန်းချက် ဓမ္မသည် လူသား ပညတ်ဘုရားများ မပွင့်ပေါ်မှီ အလျှင်ကပင် တည်ရှိနေသည်ဟု လက်ခံယုံကြည်ကြပေသည်၊ ထိုပြဌာန်းချက် ဓမ္မများသည် စကြ၀ဠာအားလုံး ဖြစ်တည်မှု အတွက် မရှိမဖြစ် လိုအပ်သော ပြဌာန်းချက် ဖြစ်သည့်အတွက် လူသားဘ၀ ကျင်လည်မှုတွင် အဖုအထစ် ရှိနိုင်သည့် နိယာမများ ပါဝင်နေပေသည်။ ထို့ကြောင့် လောက၌ ရှိနေသော အရာများမှ လူသားများ ဆောင်ရန်၊ ရှောင်ရန်ကို လူသား ပညတ်ဘုရားများ ပွင့်ပေါ်စေကာ ပြန်ဌာန်းပေးပေသည်။ ထိုပြဌာန်းချက်များမှ ဋိကာချဲ့မှုကင်းသော၊ ဂိုဏ်းအယူအဆ ကင်းသော မူလဓမ္မ သို့မဟုတ် လမ်းစဉ်ကို “မြဲမြံသော လမ်းစဉ်၊”ဟု ခေါ်ပေသည်။ ထိုလမ်းစဉ်မျိုးကို အရှင်၏ ဂုဏ်တော် ချီးမြှင့်ခြင်းခံရသော ပုဂ္ဂိုလ်မြတ်များ၏ ကျင့်ဆောင်သည့် လမ်းစဉ်မျိုး ဟု လွယ်ကူစွာ နားလည်သဘောပေါက်နိုင်ရန် သုတ်တော် (၁း၆) တွင် ဖေါ်ပြထားပေသည်။

(၁၀) နေအ်မတ် نعَمتَ ၏ အဓိပ္ပါယ်မှာ ဂုဏ်ပေးခြင်း၊ ဘုန်းပေးခြင်းဟု ဖြစ်ပေသည်၊ ဤသုတ်တော်၌ ဆိုသော အရှင့်ထံတော်မှ ဂုဏ်ပေးခြင်းခံရ သူများ ဆိုသည်မှာ ပရမတ်ဘုရားရှင်ထံမှ သဗ္ဗညုတ ရွှေဉာဏ်တော်ကို ချီးမြှင့်ခံရသော သတင်းတော်ဆောင်များ၊ သမာဓိ ခိုင်မာသော ဖြောင့်မတ် သူများ၊ သစ္စာဓမ္မ၌ ပေးဆပ်သက်သေတည်သူများ၊ မိမိကိုယ်မိမိ ကောင်းမှုသို့ ပြုပြင်ပြောင်းလဲသူများပင် ဖြစ်သည်ဟု ကျမ်းတော်၏ (၄း၆၉) တွင် ဆိုထားပေသည်။ ن ع م ကို ကျမ်းတော်တွင် သဒ္ဒါပုံစံ ပုံစံ ၉ မျိုးဖြင့် အကြိမ် ၁၄၀ ဖေါ်ပြ ထားသည်။

(၁၁) မဂ်ဿူ့ဘ် مَغضُوب ကို ဆရာတော်ကြီးများက ဘုရားသခင်ထံ၏ ကျိန်ဆဲခံရသူများဟု လည်းကောင်း ဘုရားသခင်၏ အမျက်တော်သင့် ခံရသူများဟု လည်းကောင်း ဘာသာပြန်ဆို ကြပေသည်။ ထိုသို့ ဘာသာပြန်ဆိုမှုမှာ ခရစ်ယာန်နှင့် ဂျူးဘာသာပြန်များမှ ဝေါဟာရ ပုံစံများကို မှီ၍ ဘာသာပြန်ဆိုမှုဖြစ်ပြီး အလ္လာဟ်အရှင်သည် မေတ္တာတော်ရှင်၊ ကရုဏာတော်ရှင် ဆိုသည့် ဂုဏ်တော်နှင့် ဖြောင့်ဖြောင့်ကြီး ဆန့်ကျင်လျှက်ပင် ရှိသည်၊ မြန်မာ စကားတွင် ပြောဆိုလေ့ရှိသော “ဘုရား ကျိန်စာ သင့်တော့မှာပဲ” ဆိုသည့် ဥပစာ စကားလုံးမျိုးပင် ဖြစ်သည်။ အမှန်မှာ မဂ်ဿူ့ဘ် ဆိုသည့် စကားလုံး၏ ရင်းမြစ်သည် ကျမ်းတော်တွင် သဒ္ဒါပုံစံ ၅ မျိုးဖြင့် ၂၄ ကြိမ် ဖေါ်ပြသော غ ض ب ဂဿွဘ ဖြစ်၍ ဘုရားရှင်က လူသားအား ကျိန်ဆဲခြင်း မဟုတ်ပေ။ လူသားက ဘုရားရှင် ချမှတ်သော တရား ဓမ္မအား ကြီးစွာ စော်ကားမိသောကြောင့် မိမိ၏ကံက မိမိအား ပြန်သင့်ခြင်းကို ခေါ်ပေသည်။ ပါရာဇိကံ သင့်ခြင်းမျိုး ဖြစ်သည်။ ဤစကားလုံး မဂ်ဿူ့ဘ် သည် ကျိန်စာသင့်နေသော လူမျိုးဟု မည်သည့် လူမျိုးတစ်မျိုးကိုမှ ရည်ညွှန်းခြင်း မရှိပေ မည်သူမဆို ဘုရားတရားအား စော်ကား မော်ကားပြုသော်၊ လောကဓမ္မကို ဆန့်ကျင်သော် ဆိုးကျိုး ဆက်ကို ခံစားရမည် ဖြစ်ပေသည်၊ (၃၃း၆၁)။

(၁၂) ဿွာလီးန် ضَالِّينَ မှာ မူလမှန်နေသော လမ်းကြောင်းပေါ်မှ လွဲချော်သွားသူများကို ဆိုလိုပေသည်။ ထို့ကြောင့် မြန်မာ ဘာသာရေး ဝေါဟာရ နှင့်အညီ အပါယ်သွားသူများဟု ဘာသာပြန်ဆိုခြင်း ဖြစ်ပေသည်။ ဤစကားလုံးသည်လည်း မည်သည့် လူမျိုးဖြစ်သည်ဟု ကျမ်းတော်က မရည် ညွှန်းပေ၊ လမ်းစဉ်မှန်မှ လွဲချော်သွားသော သူ မည်သူ့ကိုမဆို ဆိုလိုပေသည်။ ရင်းမြစ် ض ل ل ကို ကျမ်းတော်တွင် သဒ္ဒါပုံစံ ပုံစံ ၈ မျိုးဖြင့် ၁၉၁ ကြိမ် ဖေါ်ပြထားသည်။

၃။ သူတို့သည်ကား စက္ခုလွန်များကို ယုံကြည်ကြ၏၊ ဝတ်ပြု မြဲကြ၏ ငါအရှင် ပေးရာ ရိက္ခာများမှ ပေးကမ်းသုံးစွဲကြ ကုန်၏။

၄။ သူတို့သည်ကား သင့်ထံသို့ ချမှတ်ပေးရာ၊ သင့် ရှေ့အလျင် ချမှတ် ပေးရာများကို ယုံကြည်ကြ၏၊ နောင်ဘ၀ကိုလည်း ဒိဌယုံကြည်ကြကုန်၏။

၆။ ဖုံးကွယ်သောသူတို့သည် သူတို့အား သတိပေးသည် ဖြစ်စေ၊ သို့တည်း မဟုတ် သတိမပေးသည် ဖြစ်စေ အလားတူပင်၊ ယုံကြည်ကြမည် မဟုတ်ပေ။ ၇။ ပရမတ်ဘုရားရှင်သည် သူတို့၏ နှလုံးသားများ၊ သူတို့၏ ကြားနာမှုများကို အဆုံးသတ်လိုက်ပြီ၊ သူတို့၏ အမြင်များ အပေါ် လွှမ်းခြုံမှု ရှိနေ၏၊ သူတို့အတွက် မဟာ ဝဋ်ကြွေးကြီး ရှိနေ၏။

၈။ လူတစ်ချို့က “ကျွန်ုပ်တို့သည် ပရမတ်ဘုရားရှင်နှင့် နောက်ဆုံး နေ့ကို ယုံကြည်ပါ၏၊”ဟု ပြောကြ၏၊ သူတို့သည်ကား ယုံကြည်သူများ မဟုတ်ချေ။ ၉။ ပရမတ်ဘုရားရှင်နှင့် ယုံကြည်သော သူတို့အား လှည့်စားလိုသော ထိုသူတို့သည် မိမိတို့၏ ဉာဉ်စရိုက်ကိုသာ လှည့်စားမိကြပြီ၊ သူတို့ကား သတိမမူနိုင်ကြပေ။ ၁၀။ သူတို့၏ နှလုံးသား၌ ရောဂါ ရှိနေ၏၊ ပရမတ်ဘုရားရှင်သည် သူတို့၏ ရောဂါကို တိုးစေတော်မူပြီ၊ သူတို့၏ ငြင်းဆန်မှုများကြောင့် စူးနစ်သော ဝဋ်ကြွေးသည် ရှိနေ၏။

၁၁။ သူတို့အား “မြေကမ္ဘာ၌ အဖျက်မလုပ်နှင့်၊”ဟု ပြောသောအခါ၊ “ကျွန်ုပ်တို့သည် ပြုပြင်သူများ ဖြစ်ကြ၏၊”ဟု ပြောကြ၏။ ၁၂။ သူတို့သည် အဖျက် ကောင်များသာ ဖြစ်ကြ၏။ သို့သော် သူတို့ကား သတိမမူနိုင်ကြပေ။ ၁၃။ ယုံကြည် သူတို့ ကဲ့သို့ ယုံကြည်ကြရန် သူတို့အား ပြောသောအခါ၊ “တုံးအသူများ ကဲ့သို့ ကျွန်ုပ်တို့ ယုံကြည်ရမည်လော၊”ဟု ပြန်ပြောကြ၏၊ သူတို့သည်သာ တုံးအသူများ ဖြစ်ချေပြီ၊ သို့သော် သူတို့ သိကြသည် မဟုတ်ပေ။

၁၄။ တဖန်၊ ယုံကြည်သောသူများနှင့် ဆုံသောအခါ၊ “ကျွန်ုပ်တို့လည်း ယုံကြည်ကြ၏၊”ဟု ပြောလျက်၊ သူတို့ မကောင်းဆိုးဝါးချည်း စုမိလျှင် “သင်တို့နှင့် ကျွန်ုပ်တို့ အတူတူပင် ရှိ၏၊ ကျွန်ုပ်တို့သည် လှောင်ပြောင် သူများပင်၊”ဟု ပြောကြ ၏။၁၅။ ပရမတ်ဘုရားရှင်သည် လှောင်ပြောင်မှုကို သူတို့ဘက်သို့ တိုးရွေ့စေပြီ၊ သူတို့မှာမူ စည်းဖျက်မှုထဲ၌ မျက်ကန်းတောတိုး ဖြစ်ကြ၏။ ၁၆။ သူတို့သည် လမ်းညွှန်မှန်ကို လမ်းလွဲဖြင့် ဖလှယ်သောသူတို့ ဖြစ်၏၊ သူတို့၏ ရောင်းဝယ်မှု၌ အမြတ် မရှိ၊ လမ်းညွှန်ခံရမည့်သူများ မဟုတ်ချေ။ ၁၇။ သူတို့၏ ပမာကား မီးမွှေး သော သူကဲ့သို့ ဖြစ်၏၊ သူ၏ ပတ်လည်၌ မီးရောင်တောက်ပစဉ် ပရမတ်ဘုရားရှင် က ၎င်း၏ အထဲမှ အလင်းကို သိမ်းယူလိုက်ပြီး သူတို့အား မှောင်အတိတွင် ချန်ထားလိုက်၏၊ သူတို့ မြင်နိုင်တော့မည် မဟုတ်ချေ။ ၁၈။ ပင်းသူ၊ အသူ၊ ကန်းသူ၊ ထိုသူတို့ သည် ဦးလှည့်ကြမည် မဟုတ်ချေ။

၁၉။ သို့တည်းမဟုတ် ကောင်းကင်ယံမှ ထိခိုက်မှုအလား အမှောင်စီး၊ မိုးကြိုးပစ်၊ လျှပ်ပြက်ချိန်၌ လျှပ်စစ်ကွင်းကြောင့် ထွက်သက်ကို သတိဝင်လျက် သူတို့၏ နားများကို လက်ချောင်းများဖြင့် စီစဉ်နေကြ၏၊ ပရမတ်ဘုရားရှင်သည် ဖုံးကွယ်သူတို့အား ဝိုင်းဝန်းထားလေပြီ။ ၂၀။ သူတို့၏ အမြင်အား သိမ်းသွားလုနီး ဖြစ်သော လျှပ်စက်ကွင်း၌၊ လင်းလက်စဉ် သွားလာကြ၍၊ သူတို့အား အမိုက်မှောင် စီးတိုင်း ရပ်နေကြ၏၊ ပရမတ်ဘုရားရှင်သည် စံချိန်အတိုင်း သူတို့၏ အကြား အမြင်ကို ရုတ်သိမ်းနိုင် တော်မူ၏ ဧကန်ပင် ပရမတ်ဘုရားရှင်သည် သဗ္ဗလုံးစုံအား စည်းချိန်ချမှတ်တော်မူ၏။

၂၁။ အို-လူသားတို့၊ သင်တို့ စည်းစောင့်နိုင်အံ့ငှာ- သင်တို့နှင့် သင်တို့၏ ရှေ့အလျင် ဖြစ်သူများအား ဖြစ်တည်စေသည့်၊ သင်တို့၏ ကံကြမ္မာရှင်အား ကိုးကွယ်ကြကုန်လော့။ ၂၂။ အရှင်သည် သင်တို့ အတွက် မြေပြင်ကို နားခိုရာနှင့်၊ ကောင်းကင်ကို ထပ်ခိုး အဖြစ် စီစဉ်ပေးသော အရှင် ဖြစ်၏၊ ကောင်းကင်ယံမှ ချပေးသော ရေဖြင့် ပေါက်ပွားစေသည့် သီးနှံများမှ သင်တို့အတွက် အစာရိက္ခာ ဖြစ်စေ၏၊ သို့-သိနေပါလျက် ပရမတ်ဘုရားရှင်အား ဂုဏ်တုပြိုင်ဘက် မစီစဉ်ကြ နှင့်-

၂၃။ ငါ၏ အမှုတော်ဆောင်သို့ ချမှတ်ပေးရာ၌ သင်တို့ သံသယ ဖြစ်ကြ လျှင် ၎င်းမှ ဓမ္မခန္ဓာ တစ်ခုကဲ့သို့ ပေးအပ်ကြလော့၊ သင်တို့သည် ဖြောင့်မှန်သူများ ဖြစ်ကြလျှင် ပရမတ်ဘုရားရှင် မှလွဲ၍ သင်တို့၏ သက်သေများကို ခေါ်ကြလော့။ ၂၄။ သင်တို့ မပြုလုပ်နိုင်ခဲ့၊ ပြုလုပ်နိုင်မည်လည်း မဟုတ်ချေ၊ ထို့ကြောင့် လူသားများ၊ ကျောက်သားများကို လောင်စာ လုပ်လျက် ဖုံးကွယ်သူများအတွက် တွက်ချက်ပြင်ဆင်ထားသော မီးမှ ကင်းရန် စည်းစောင့်ကြလော့။

၂၅။ ယုံကြည်၍ ပြုပြင်ပြောင်းလဲမှု ကျင့်ကြံသောသူ၊ ထိုသူတို့ အတွက် ရိက္ခာများ ရှိသည့် အောက်ခင်း၌ စမ်းချောင်းရေသွင် စီးဆင်းနေသော ဥယျာဉ်များ ထို၌ “ရှေ့ယခင်က ကျွန်ုပ်တို့ ရိက္ခာရဘူးပါ၏၊” ဟု အချိန်တိုင်း ပြောရလောက် သော ဆင်တူ သီးနှံ ရိက္ခာများဖြင့် ချီးမြှင့်ခံရမည့် အကြောင်း၊ သန့်စင်သည့် စုဖွဲ့ဖေါ်များ ရှိကြောင်း၊ ထို၌ ကာလမဲ့ကြောင်း သတင်းကောင်းကိုပါးလော့။ ၂၆။ ပရမတ်ဘုရားရှင်သည် မည်သည့် ပမာဖြင့် ဥပမာပေးမှုကို မဆို- ခြင်မတစ်ကောင် မျှ ထိုထက်မကပင် ဖြစ်စေကာမူ ရှက်ဘွယ်လိလိ ဟု မသတ်မှတ်ပေ။ ယုံကြည် သော သူများကမူ ၎င်းသည်ပင် ကံကြမ္မာရှင်၏ ထံမှ သစ္စာတရားဟု သိကြလတ္တံ့၊ ဖုံးကွယ်သော သူများကမူ “ပရမတ်ဘုရားရှင်က ဤပမာဖြင့် ဘာကို ဆိုလို သနည်း၊” ဟု ပြောလိုကြ၏၊ ၎င်းဖြင့် များစွာတို့မှာ လမ်းလွဲကြ၍၊ ၎င်းဖြင့်ပင် များစွာတို့မှာ လမ်းညွှနှ်မှန်ကို ရကြ၏၊ ယုတ်မာသူများသည်သာ ၎င်းအားဖြင့် လမ်းလွဲကြ ကုန်၏။

၂၇။ ပရမတ်ဘုရားရှင်၏ ပဋိညာဉ်အား အာမဘန္တေပြုပြီး နောက်မှ ချိုး ဖေါက်ကြ၍၊ ပရမတ်ဘုရားရှင်က ပူးပေါင်းကြဟု ညွှန်ကြားသည်ကို ဖြတ်တောက် လျှက်၊ ကမ္ဘာအဝှန်း အဖျက်လုပ်ကြသော ထိုသူတို့သည် ဆုံးရှုံးရမည့် သူများပင်။

၂၈။ သင်တို့အား သေခြင်းမှ ရှင်ခြင်းသို့ ဖြစ်စေသော ပရမတ်ဘုရားရှင် အား သင်တို့ မည်သို့ ဖုံးကွယ်အံ့နည်း၊ သင်တို့အား တဖန် သေစေ၍၊ တဖန် ရှင်စေ တော်မူမည်၊ ထို့နောက် အရှင့်ထံသို့ လှည့်ပြန်ရမည်ပင်။ ၂၉။ ထိုအရှင်သည် ကမ္ဘာ အဝှန်းမှ အားလုံးကို သင်တို့ အတွက် ဖြစ်တည်စေ၏ ထို့ပြင် အလားတူ ကောင်းကင်ယံသို့ အာကာ ခုနစ်ဆက် ပုံစံချခဲ့၏ ထိုအရှင်သည် သဗ္ဗလုံးစုံအား သိနေတော်မူသော အရှင် ဖြစ်၏။

၃၀။ သင်၏ကံကြမ္မာရှင်က နိမိတ်ဆောင်တို့အား “မြေကမ္ဘာ၌ သမ္မတမင်း ကို ငါ စီစဉ်မည်၊”ဟု မိန့်ဆိုသော်၊ “အဖျက်လုပ် သွေးထွက်သံယို ဖြစ်စေသူအား အရှင် စီစဉ်ပါမည်လော၊ တပည့်တော်တို့ကား အရှင်၏ မြင့်မြတ်မှုကို ရည်သန် စူးစိုက် ဦးထိပ်ထားပါသည်”ဟု လျှောက်ကြ၏။ အရှင်က “ငါသည်ကား သင်တို့ မသိသည်ကို သိနေတော်မူ၏၊”ဟု မိန့်တော်မူ၍- ၃၁။ အရှင်သည် အာဒံအား အမည် များ ကိုယ်စီကို သင်ပေးကာ၊ နိမိတ်ဆောင်များ၏ အပေါ် ဘောင်ဝင်စေရန်၊ “သင်တို့သည် ဖြောင့်မှန်သူများ ဖြစ်ကြလျှင်၊ ၎င်းတို့၏ အမည်များကို ငါ့အား သတင်းပေးကြလော့၊” ဟု မိန့်ဆို၏။ ၃၂။ သူတို့က “အရှင်သည် ဦးထိပ်ထားရာ ဖြစ် ပါ၏၊ တပည့်တော်တို့ သည် သင်ပေးခံခဲ့ရသည်မှ အပ အသိပညာ မရှိပါ၊ အရှင် သည်သာ သိနေသောအရှင်၊ ဓမ္မသတ်ရှင် ဖြစ်ပါသည်၊”ဟု လျှောက်တင်ကြ၏၊၊

၃၃။ အရှင်က “အေ-အာဒံ၊ ၎င်းတို့၏ အမည်များကို သတင်းထုတ်ပြန် လော့၊”ဟု မိန့်ဆို၏၊ သို့ဖြစ်၍ သူသည် ထိုအမည်များကို သတင်းထုတ်ပြန်သော်- အရှင်က “ကောင်းကင်များနှင့် မြေကမ္ဘာ၏ စက္ခုလွန်များ ကို ငါသိနေကြောင်း၊ သင်တို့၏ ဖွင့်ဟရာနှင့် ထိန်ဝှက်လေ့ ရှိရာများကို ငါ သိနေကြောင်း၊ သင်တို့အား ငါ မပြောခဲ့သလော၊”ဟု မိန့်ဆို၍၊ ၃၄။ ငါက နိမိတ်ဆောင်တို့ကို “အာဒံအား ဦးချကြ လော့၊”ဟု မိန့်မြွက်သော် ဦးချကြကုန်၏၊၊ သို့သော် ရှေးရိုးစွဲ၊ သူသည် ဖီဆန်၍ မောက်မာ၏၊ သူသည်ကား ဖုံးကွယ်သူတို့၏ အနက်မှ ဖြစ်ရပြီ။

၃၅။ ငါက “အေ-အာဒံ၊ သင်နှင့် သင့်အဖေါ်သည် ဥယျာဉ်မြေ၌ စံချိန် အတိုင်း အခြေချ၍ နေရာတိုင်း၌ ပေါပေါသီသီ စားသုံးကြလော့၊ သို့သော် ဤအပင် သို့ မချည်းကပ်နှင့် သို့မဟုတ်က အမိုက်ကောင်များမှ ဖြစ်ချေမည်၊”ဟု မိန့်မြွက်၏။ ၃၆။ ထို့နောက် မကောင်းဆိုးဝါးက သူတို့အား ချော်ထွက်စေ၏၊ သူတို့ကို ရှိနေရာမှ ပယ်ထုတ်ခဲ့၏။ ထို့ကြောင့် “ဆင်းသွားကြလော့၊ သင်တို့မှ အချို့သည် အချို့အား စည်းဖေါက်သူများ ဖြစ်စေလော့၊ မြေကမ္ဘာ၌ တည်ငြိမ်ချမ်းမြေ့ရာ ကာလတစ်ခု ရှိနေ၏၊”ဟု ငါ မိန့်၏။ ၃၇။ ထို့နောက် အာဒံသည် ကံကြမ္မာရှင်၏ထံမှ မုက္ခပါတ် တော်အား ခင်းကျင်းခံရ၏၊ သို့ဖြစ်၍ သူသည် အရှင့်ထံ၌ ခဝါချလေ၏၊ အရှင် သည်ကား သင်ပုန်း ချေပေးသော အရှင် အကြင်နာရှင် ဖြစ်၏။

၃၈။ ငါ မိန့်ကြားသည်မှာ “အားလုံး-ဆင်းသွားကြလော့၊ ငါ၏ ထံမှ လမ်းညွှန်ချက်များ သင့်တို့ထံသို့ ချီးမြှင့် သောအခါ၊ ငါ၏ လမ်းညွှန်ချက်ကို လိုက်နာသူ၊ ထိုသူတို့အား ကြောက်ရွံ့ရစေမည် မဟုတ်၊ သောကရောက်ရ စေမည် လည်း မဟုတ်ချေ။ ၃၉။ သို့သော် ဖုံးကွယ်သော သူ၊ ငါ၏ သုတ်ဒေသနာများကို ငြင်းဆန်သူ ထိုသူများသည် အပူမီး၏ ပေါင်းဖေါ်များ ဖြစ်ကြ၏၊ ထို၌ ကာလမဲ့ စံမြန်းရလတ္တံ့” ၄၀။ အို-ဂျူးလူမျိုးတို့၊ သင်တို့အား ငါ ဂုဏ်ပေးသည့် ဂုဏ်ပုဒ်များကို သတိရကြလော့၊ ငါ့ထံရှိ ပဋိညာဉ်ကို ပြီးပြည့်စေလော့၊ ငါသည်လည်း သင်တို့ အပေါ်ရှိ ပဋိညာဉ်ကို ပြီးပြည့်စေပြီ၊ ငါ့ကို သာလျှင် ကြောက်ရွံ့ကြလော့။ ၄၁။ သင်တို့နှင့် အတူရှိသည်ကို ဖြောင့်မှန်စေသည့်- ငါ ချမှတ်ပေးရာ၌ ယုံကြည်ကြ လော့။ ၎င်းအား ရှေ့ဆုံးမှ ဖုံးကွယ်သူများ မဖြစ်ကြနှင့်၊ ငါ၏ သုတ်ဒေသနာများကို တန်ဘိုးချ မရောင်းစားကြနှင့်၊ ငါ့အားသာလျှင် စည်းစောင့်ကြလော့။ ၄၂။ အမှန်ကို အမှားဖြင့် မဆင်ယင်ကြနှင့်၊ သင်တို့ သိနေလျှက် အမှန်ကို မထိန်ဝှက်ကြနှင့်။

၄၃။ ဝတ်ပြုခြင်း၌ မြဲကြလော့၊ အခွန်ငွေဖြူ ပေးကြလော့ ဦးညွှတ်သူများ နှင့် အတူ ဦးညွှတ်ကြကုန်လော့။ ၄၄။ သင်တို့၏ စရိုက်ကို သင်တို့ မေ့လျက် လူသား တို့အား ကောင်းမှုဆောင်တာ ညွှန်ကြားကြသလော၊ သင်တို့သည် ကျမ်းတော်ကို ရွတ်ဖတ်လျှက် အတွေးအခေါ် မရှိကြသလော။ ၄၅။ သည်းခံခြင်း၊ ဝတ်ပြုခြင်းဖြင့် ပံ့ပိုးမှုကို ရှာကြလော့၊ ၎င်းသည် ကျို့ငဲ့သူများ အတွက်မှ အပ ဝန်ကြီးလှ၏။ ၄၆။ သူတို့သည် ကံကြမ္မာရှင်နှင့် ဆုံတွေ့ရမည်၊ အရှင့်ထံသို့သာ ဦးလှည့်ပြန်ရမည်ဟု စဉ်းစားကြကုန်၏။

၄၇။ အို-ဂျူးလူမျိုးတို့ သင်တို့အား ငါ ဂုဏ်ပေးသည့် ဂုဏ်ပုဒ်များကို သတိရကြလော့၊ ငါသည် သင်တို့ကို လောကခပ်သိမ်း အပေါ်၌ သိက္ခာပေးခဲ့ပြီ။ ၄၈။ ဉာဉ်တစ်ခုက ဉာဉ်တစ်ခု အတွက် တစ်စုံတစ်ရာ အစားမပေးနိုင်သော၊ အမျှဝေ၍ အကိုးမပြည့်သော၊ တန်ရာတန်ကြေးကို လက်မခံသော၊ အကူအညီမဲ့ နေ့ကာလ အတွက် စည်းစောင့်ကြလော့။ ၄၉။ ထို့ပြင် သင်တို့၏ သားယောက်ျားများကို သုတ်သင်ကာ၊ မိန်းမများကိုသာ အသက် ဆက်ခွင့်ပေးသည့် ဖါရိုး မင်းဆက်၏ အကုသိုလ် ဝဋ်ကြွေး အမှတ်သညှာ ဖြစ်စေသူများမှ သင်တို့အား ငါ လွတ်မြောက် စေခဲ့ပြီ၊ ထို၌ သင်တို့အား သင်တို့၏ ကံကြမ္မာရှင်မှ မဟာ စုံစမ်းမှုကြီး ရှိနေ၏။ ၅၀။ ထို့ပြင် ငါသည် သင်တို့ အတွက် ပင်လယ်ပြင်ကို ခွဲခဲ့ပြီ၊ သင်တို့အား လွတ်မြောက် စေ၍ သင်တို့ ကြည့်နေစဉ်ပင် ဖာရိုး မင်းဆက်အား နစ်စေခဲ့ပြီ။

၅၁။ ငါသည် မူဆာအား ညပေါင်းလေးဆယ် ကတိထားစဉ်၊ သူ့ နောက် ကွယ်၌ ဤနွားငယ်အား သင်တို့ အယူထားကြ၏။ သင်တို့သည် အမိုက်ကောင်များ ဖြစ်ကြ၏။ ၅၂။ တဖန် ထို့နောက်တွင် သင်တို့အား ကျေအေးပေးခြင်းမှာ သင်တို့ ကျေးဇူးသိတတ်အံ့ငှာ- ၅၃။ မူဆာအား ကျမ်းတော် နှင့် ခွဲခြမ်းစိတ်ဖြာဖွင့်ဆိုမှုကို ပေးအပ်ခြင်းမှာ သင်တို့ လမ်းညွှန်ကို ရအံ့ငှာ ဖြစ်၏။

၅၄။ မူဆာက သူ့ လူမျိုးအား “အို- ကျွန်ုပ်၏ လူမျိုးတို့ သင်တို့သည် ထိုနွားငယ်ကို အယူပိုက်၍ သင်တို့ စရိုက်ကို သင့်တို့ မိုက်ကြေးခွဲကြပြီ၊ ထိုစရိုက် ကို သတ်၍ စင်ကြယ်သည့်အရှင်၌ ခဝါချကြလော့၊ ၎င်းသည် စင်ကြယ်သော အရှင့်ထံ၌ သင်တို့အတွက် ပိုကောင်း၏၊ အရှင်သည် သင်တို့ အပေါ်တွင် သင်ပုန်း ချေတော်မူပြီ၊ အရှင်သည်ကား သင်ပုန်းချေသော အရှင် အကြင်နာရှင် ဖြစ်၏၊”ဟု ပြောသောအခါ- ၅၅။ သင်တို့က “ဟေး-မူဆာ၊ ပရမတ်ဘုရားရှင်ကို ပေါ်ပေါ် ထင်ထင် မရှုမြင်ရသ၍ သင့်ကို ကျွန်ုပ်တို့ မယုံကြည်နိုင်ပါ၊”ဟု ပြောကြသဖြင့်၊ သင်တို့ စောင့်ကြည့်နေစဉ် သင်တို့အား တော်လည်းသံကြီးဖြင့် ဖမ်းယူလေပြီ။ ၅၆။ တဖန် သင်တို့ ကျေးဇူး သိတတ်အံ့ငှာ သင်တို့အား ဘ၀သေပြီးနောက် နိုးကြွစေ ခဲ့ပြီ။

၅၇။ သင်တို့အား တိမ်လိပ်ဖြင့် ငါ အရိပ်ပေးတော်မူ၏၊ သုဓာနှင့် ငုံးငှက် တို့ကို ချပေးတော်မူ၏၊ ငါပေးသည့် ရိက္ခာများမှ စင်ကြယ်ရာကို စားသုံးကြလော့၊ သင်တို့အား ငါက အဝိဇ္ဇာသင့်စေသည် မဟုတ်၊ သို့ရာတွင် သူတို့၏စရိုက်ကို သူတို့ မိုက်ကြေးခွဲခြင်း ဖြစ်ကြပြီ။ ၅၈။ သူတို့အား “ဤ အရပ်သို့ ဝင်လော့၊ စံချိန်အတိုင်း နေရာတိုင်း၌ ပေါပေါသီသီ စားသုံးလော့၊ သံဝေဂစကား ပြောဆိုလျက်၊ တံခါး ပေါက်၌ နှိမ့်ချ၍ ဝင်ကြလော့၊ သင်တို့အား အမှားများမှ ငါ လွတ်ငြိမ်းစေမည်၊ သုမင်္ဂလာပြုသူများအား တိုးပွားစေမည်၊”ဟု ငါ မိန့်မြွက်၏။ ၅၉။ မိုက်ကြေးခွဲသော သူများသည် သူတို့ အတွက် မဟုတ်သော စကားတော်ကို လွှဲပြောင်း ပြောဆိုကြ၏၊ သူတို့၏ ယုတ်မာလေ့ ရှိခြင်းများကြောင့် ထိုမိုက်ကြေးခွဲသော သူများအတွက် ကောင်းကင်ယံမှ ဆိုးကျိုးကို ငါ ချမှတ်တော်မူ၏၊

၆၀။ သူ့လူမျိုး အတွက် သောက်ရေရရန် မူဆာ ဆုတောင်းသော် “သင့် လက်ထောက်ကို ကျောက်တောင်သို့ ခရီးနှင်စေလော့၊” ဟု ငါ မိန့်၏၊ ထို၌ စိမ့်စမ်း ဆယ့်နှစ်သွယ် စီးထွက်၍ လူစုကိုယ်စီ သောက်ရေရှိရာကို သိကြပြီ၊ ပရမတ် ဘုရားရှင်၏ ရိက္ခာများမှ စားကြသောက်ကြလော့၊ ကမ္ဘာ၌ ညစ်ညမ်းစုတ်ပဲ့၊ အဖျက်ကောင်များ မဖြစ်ကြနှင့်-

၆၁။ သင်တို့က “အို- မူဆာ၊ ကျွန်ုပ်တို့သည် အစာ တစ်မျိုးတည်းနှင့် သည်းမခံနိုင်ပါ၊ ကျွန်ုပ်တို့ အဘို့ မြေမှ ထွန်းသော ဟင်းရွက်၊ သခွား၊ ဂျုံ၊ ပဲ၊ ကြက်သွန်များ ပေါက်ရောက်စေရန် သင့်ကံကြမ္မာရှင်၌ ဆုတောင်းလော့၊”ဟု ဆိုသော် သူက “ပိုကောင်း ရာကို လောကီရမက်ဖြင့် သင်တို့ လွှဲပြောင်း လိုသလော၊ မြို့ဘက်သို့ ဆင်းသွားလော့၊ သို့မှသာ သင်တို့ တောင်းဆိုခြင်းများ ရနိုင်ကောင်း ၏၊”ဟု ပြန်ပြော၏၊ ထို့နောက် သူတို့အား နှိမ်ခံရခြင်း နွမ်းပါးခြင်းတို့ ထိစေပြီ၊ ပရမတ်ဘုရားရှင်၏ ထံတော်မှ ကံကြီးသင့်မှုကို ဆွဲယူကြပြီ၊ ဤသည်မှာ ပရမတ် ဘုရားရှင်၏ သုတ်ဒေနာများကို ဖုံးကွယ်ခြင်း၊ သတင်းတော်ဆောင်များကို သစ္စာ မဲ့စွာ သတ်ဖြတ်ခြင်းတို့ကြောင့် ဖြစ်၏၊ ယင်းမှာ သူတို့၏ အာခံမှုနှင့် စည်းဖေါက်မှု ကြောင့် ဖြစ်၏။

၆၂။ ဧကန်ပင်- ယုံကြည်သောသူ၊ ရေ၀တီ၊ ခရစ်ယာန်နှင့် ရေသန့်အယူ ရှိသော သူများ၊ မည်သူမဆို ပရမတ်ဘုရားရှင်နှင့် နောင်ဘ၀ နေ့ကာလကို ယုံကြည် လျှက် ပြုပြင်ပြောင်းလဲမှု ကျင့်ကြံ၏၊ ထိုသူတို့ အတွက် ဆုလဒ်သည် ကံကြမ္မာရှင် ၏ ထံ၌ ရှိ၏။ သူတို့အား ကြောက်ရွံ့ရစေမည် မဟုတ်၊ သောကရောက်ရ စေမည် လည်း မဟုတ်ချေ။

၆၃။ ထို့ပြင် ငါသည် သင်တို့၏ ကတိခံဝန်ချက်ကို ယူ၍၊ သင်တို့ အပေါ်၌ တောင်တော်ကို မြှောက်စားခဲ့ပြီ၊ သင်တို့သည် စည်းစောင့်နိုင်အံ့ငှာ- ငါအရှင် ပေးအပ်ရာ၌ အစွမ်းရှိရှိ အယူမြဲလော့၊ ထို၌ သတိတရ ရှိကြလော့။ ၆၄။ တဖန် သည့်နောက်တွင်မှ သင်တို့ ပြန်လှည့်ခဲ့၏၊ သင်တို့ အပေါ်သို့ ပရမတ်ဘုရားရှင်၏ သိက္ခာပေးမှုနှင့် ကရုဏာတော် မသက်ခဲ့လျှင် သင်တို့သည် ဆုံးရှုံးသူများမှ ဖြစ်ချေပြီ။ ၆၅။ သင်တို့မှ သီတင်းနေ့၌ စည်းဖေါက်သော သူအား “သင်တို့သည် ရှက်ဘွယ်လိလိ မျောက်များ ဖြစ်ကြလော့၊”ဟု ငါ မိန့်ဆိုသည်ကို သင်တို့ သိကြ၏။ ၆၆။ ပစ္စုပ္ပာန်နှင့် အနာဂါတ် အတွက် နမူနာ အဖြစ်၊ စည်းစောင့်သူများ အတွက် ဩဝါဒအဖြစ် ငါ စီစဉ်တော်မူ၏။

၆၇။ မူဆာက သူ့လူမျိုးအား “သင်တို့သည် နွားမကို လှီးသတ်လော့၊” ဟု ပရမတ်ဘုရားရှင်၏ ညွှန်ကြားမှုကို ပြောဆိုသော် “ကျွန်ုပ်တို့ကို လှောင်ပြောင် ဖမ်းစားနေသလော၊”ဟု ပြောကြ၏။ သူက “ကျွန်ုပ်သည် ပညာမဲ့တို့မှ မဖြစ်ရန် ပရမတ်ဘုရားရှင်၌ ခိုလှုံပါ၏၊”ဟု ပြန်ပြော၏။ ၆၈။ သူတို့က “ဘယ် သူမနည်း၊ ကျွန်ုပ်တို့ ရှင်းလင်းစေရန် သင့်ကြမ္မာရှင်၌ ဆုတောင်းလော့၊”ဟု ပြောကြ၏။ သူက “အရှင် မိန့်သည်မှာ သူမသည် အသုံးပြုပြီး မဟုတ် နုလွန်းသည်လည်း မဟုတ် ယင်းကြားမှ ပံ့ပိုးနိုင်သော နွားမ ဖြစ်၏၊ ညွှန်ကြားချက် အတိုင်း ပြုလုပ်ကြလော့၊” ဟု ပြန်ပြော၏။

၆၉။ သူတို့က “ဘယ် အရောင်နည်း၊ ကျွန်ုပ်တို့ ရှင်းလင်းစေရန် သင့် ကြမ္မာရှင်၌ ဆုတောင်းလော့၊”ဟု ပြောပြန်သော် “အရှင် မိန့်သည်မှာ၊ ကြည့်သူတို့ ကြိတ်ကြည်နူးကြသည့် ရွှေအိုရောင် နွားမပင်၊”ဟု ဆို၏။ ၇၀။ “နွားမများမှာ ကျွန်ုပ်တို့ အဘို့ ဆင်တူများ ဖြစ်ပါ၏၊ ဘယ်သူမ ဖြစ်ကြောင်း ကျွန်ုပ်တို့ ရှင်းလင်း စေရန် ဆုတောင်းလော့၊ ပရမတ်ဘုရားရှင်၏ စံချိန်ပြည့်ခဲ့သော် ကျွန်ုပ်တို့သည် လမ်းညွှန်ခံရမည့်သူများ ဖြစ်၏”ဟု ပြောကြ၏။ ၇၁။ သူက “အရှင်မိန့်သည်မှာ သူမသည် မြေနိမ့်ကို တူးဖေါ်ခြင်း မရှိ၊ ထွန်ယက် မျိုးချ စိုက်ပျိုးခြင်း မရှိ- အေးအေးလူလူ အပြစ်အနာ ကင်းသော၊ နွားမပင်၊”ဟု ပြောသောအခါ၊ “ယခုမှ သင်သည် အမှန်တရားဖြင့် ရောက်လာပြီ၊”ဟု ပြောကြလျက် သူမကို လှီးသတ် လိုက်၏၊ သို့သော် ပြုလုပ်ရန် မနီးစပ်လိုကြချေ။

၇၂။ သင်တို့သည် စရိုက်တစ်ခုကို သတ်ခဲ့၍၊ ၎င်း၌ ပလပ် လိုကြ၏၊ ပရမတ်ဘုရားရှင်သည် သင်တို့၏ ထိန်ဝှက်ထားလေ့ ရှိရာကို ဖေါ်ထုတ်ခဲ့လေပြီ။ ၇၃။ သို့ဖြင့် ငါက “ထိုမှ အချို့ဖြင့် နည်းလမ်းရှာလော့၊”ဟု မိန့်ခြွေ၏။ ဤသို့ ပရမတ်ဘုရားရှင်သည် သေနေရာမှ ရှင်ပြန်စေတော်မူပြီ၊ သင်တို့ အတွေးအခေါ် ရှိအံ့ငှာ၊ သင်တို့အား အရှင်၏ သုတ်ဒေသနာများကို ပြသတော်မူ၏။ ၇၄။ တဖန် ထို့နောက်တွင် သင်တို့၏ နှလုံးသားများသည် ခက်ထန်လာ၏၊ ၎င်းသည် ကျောက်တုံး ကဲ့သို့ သို့တည်းမဟုတ် ထို့ထက်ပင် ခက်ထန်ကြ၏။ ကျောက်ခဲများ၌ စမ်းချောင်း စီးထွက်သည်လည်း ရှိ၏၊ အက်ကွဲ၍ ရေများ စိမ့်ယိုသည်လည်း ရှိ၏၊ ပရမတ်ဘုရားရှင်အား ကြောက်ရွံ့၍ ပြိုဆင်းသည်လည်း ရှိ၏။ ပရမတ်ဘုရားရှင် သည်ကား ကျင့်ကြံလေ သမျှကို မေ့လျော့ထားသည် မဟုတ်ပေ။

၇၅။ သူတို့မှ တစ်ဖွဲ့သည် သင်တို့ကို ယုံကြည်လိမ့်မည်ဟု သင်တို့ မျှော်လင့်နေသလော၊ သူတို့သည် ပရမတ်ဘုရားရှင်၏ ဓမ္မတော်များကို နာယူ၍၊ ပြီးနောက်မှ အတွေးအခေါ် ရှိပါလျက်၊ သိနေပါလျက် ၎င်းကို လှည့်ပြောင်းကြ၏။ ၇၆။ ယုံကြည်သောသူများနှင့် ဆုံသောခါ “ကျွန်ုပ်တို့လည်း ယုံကြည်၏၊”ဟု ပြောကြ လျက် သူတို့မှ အချို့က အချို့ကို “သင်တို့အား ပရမတ်ဘုရားရှင်က ထွက်ပေါက် ပေးထားသည်ကို ဆင့်ပြန်လိုက်သလော၊ သူတို့က ၎င်းအားဖြင့် ကံကြမ္မာရှင်၏ ထံ၌ သင်တို့ကို စောကြောနိုင်ရာ၏၊ သင်တို့၌ အတွေးအခေါ် မရှိကြသလော၊”ဟု ပြောဆိုကြ၏။

၇၇။ ပရမတ်ဘုရားရှင်သည် သူတို့၏ ကြိတ်ကြံရာ၊ လူသိရှင်ကြား ပြုရာ များကို သိနေတော်မူကြောင်း သူတို့ မသိကြသလော။ ၇၈။ သူတို့၌ ဆန္ဒရမက် စွက် သော စဉ်းစားချက် မှအပ ကျမ်းတော်ကို မသိကြသော စာမတတ်သူများ ရှိ၏။ ၇၉။ တန်ဘိုးချ ရောင်းစားရန် အလို့ငှာ သူတို့၏ လက်ဖြင့် ပြဌာန်းသော ကျမ်းစာကို “ဤသည် ပရမတ်ဘုရားရှင်၏ ထံမှတည်း၊”ဟု ပြောဆိုသော သူတို့သည်၊ ပျက်စီး ရမည်သာတည်း။ သူတို့၏ လက်ဖြင့် ပြဌာန်းသောကြောင့် ပျက်စီးရမည်သာ တည်း၊ သူတို့၏ ကျင့်ဆောင်မှုကြောင့် ပျက်စီးရမည်သာတည်း။

၈၀။ သူတို့က “အပူမီးမှာ ကျွန်ုပ်တို့အား တွက်ချက် သတ်မှတ်ထားသော ရက်များမျှသာ ထိကပ်နိုင်မည်”ဟု ဆိုကြ၏။ သူတို့အား “ပရမတ်ဘုရားရှင်၏ ထံမှ ပဋိညာဉ်ကို သင်တို့ ရယူထားကြသလော၊ သို့ဖြစ်လျှင် ပရမတ်ဘုရားရှင်က ပဋိညာဉ်အား ပေါ့ပျက်မည် မဟုတ်၊ သို့တည်းမဟုတ် ပရမတ်ဘုရားရှင်နှင့် စပ်လျဉ်း၍ သင်တို့ မသိသည်ကို ပြောနေကြသလော၊”ဟု မေးမြန်းလော့။ ၈၁။ အမှန်မှာ အကုသိုလ် ကျင့်ဆောင်သူအား၊ သူ၏ အမှားက ဝိုင်းထားလေပြီ၊ သူတို့ သည် အပူမီး၏ ပေါင်းဖေါ်များ ဖြစ်ကြ၏ ထို၌ ကာလမဲ့ ခံစားရမည်ပင်။ ၈၂။ ယုံကြည်၍ ပြုပြင်ပြောင်းလဲမှု ကျင့်ကြံသော သူတို့သည်ကား သုခဘုံ၏ ပေါင်းဖေါ် များ ဖြစ်ကြ၏၊ ထို၌ ကာလမဲ့ စံစားရမည်ပင်။

၈၃။ ငါသည် ဂျူးတို့ထံမှ “ပရမတ်ဘုရားရှင်ကိုသာ ကိုးကွယ်ရန်၊ မွေးမိဘများ၊ ဆွေမျိုးနီးစပ်များ၊ မိဘမဲ့များနှင့် နွမ်းပါးသူများ အပေါ် သုမင်္ဂလာ ပြုရန်၊ လူသားတို့အား တင့်တင့်တယ်တယ် ပြောဆိုကြရန်၊ ဝတ်ပြု မြဲကြရန်၊ အခွန်ငွေဖြူ ပေးကြရန်” ပဋိဉာဉ်ကို ယူခဲ့၏။ တဖန် သင်တို့ အနက် အနည်းငယ်မှ အပ လှည့်သွားကြလေပြီ၊ သင်တို့သည်ကား ဘောင်ကန့်ထားသူများ ဖြစ်ကြ၏။ ၈၄။ သွေးထွက်သံယို မပြုရန်၊ သင်တို့၏ စရိုက်များကို ဗိမာန်တော်မှ မောင်း မထုတ်ရန် သင်တို့ထံမှ ပဋိဉာဉ်ကို ငါ ယူခဲ့ပြီ၊ သင်တို့ အတည် ပြုခဲ့သည်မှာ သင်တို့ ကိုယ်တိုင် သက်သေပင်။

၈၅။ တဖန် သင်တို့သည် စရိုက်ကောင်းများကို သုတ်သင်ပစ်၏၊ သင်တို့မှ တစ်ဖွဲ့ကို သူတို့၏ ဗိမာန်များမှ နှင်ထုတ်ကြ၏၊ ပြစ်မှုနှင့် စည်းဖေါက်မှု၌ ကျောထောက် နောက်ခံပြုကြ၏။ သင်တို့ထံသို့ သုံ့ပန်းများ ရောက်လာလျှင် သူတို့ ကို ရွေးယူသင့်၏၊ သူတို့အား မောင်းထုတ်ခြင်းမှ သင်တို့အား တားမြစ်ပြီး ဖြစ်၏။ သင်တို့သည် ကျမ်းတော်မှ တစ်ချို့ကို ယုံကြည်၍ တစ်ချို့ကို ဖုံးကွယ်ကြသလော၊ သင်တို့၌ ထိုသို့ပြုလုပ်သူ၏ အစားရမှုမှာ လောကီသက်တမ်း၌ အရှက်ရစေ၍၊ ရပ်တည်ရသောနေ့၌ ပြင်းထန်သော ဝဋ်ကြွေးဆီသို့ ပြန်ပို့ခံရလတ္တံ့။ ပရမတ် ဘုရားရှင်သည် ကျင့်ကြံသမျှကို မေ့လျော့ထားသည် မဟုတ်ပေ။ ၈၆။ နောင်ဘ၀ အား လောကီဘ၀ဖြင့် ရောင်းစားသောသူတို့၊ ထိုသူတို့နှင့် စပ်လျဉ်းသည့် ဝဋ်ကြွေး ကို ပေါ့ပါးစေမည် မဟုတ်၊ သူတို့သည် ကူညီခံရမည်လည်း မဟုတ်ချေ။

၈၇။ ဧကန်မုချ၊ ငါသည် မူဆာအား ကျမ်းတော် ပေးအပ်ခဲ့၏၊ သူ၏နောက် ဉာဏ်စဉ်ဆောင်များကို စဉ်ဆက် ထပ်ဆင့် ပွင့်ပေါ်စေခဲ့ပြီ၊ မာရိ၏သား ယေရှုကို လည်း ရှင်းလင်းချက်များ ပေးအပ်၍ မြတ်သော ဉာဏ်စဉ်တော်ဖြင့် ထောက်ပံ့ခဲ့ ၏၊ ဉာဏ်စဉ်ဆောင် တစ်ပါးသည် သင်တို့၏ စရိုက်လိုဘ မကိုက်ညီရာနှင့် သင်တို့ ထံသို့ ရောက်လာတိုင်း သင်တို့ မာနတက်နေကြသည် မဟုတ်လော၊ သင်တို့သည် တစ်ဖွဲ့ကို ငြင်းဆန်ပြီး၊ တစ်ဖွဲ့ကို သတ်ခဲ့ကြချေပြီ။ ၈၈။ သူတို့က “ကျွန်ုပ်တို့၏ နှလုံးသားကို ပိတ်ထားပြီးပြီ၊”ဟု ဆိုကြ၏၊ အမှန်မှာ သူတို့၏ ဖုံးကွယ်မှုနှင့် အနည်းငယ်မျှပင် မယုံကြည်မှု တို့ကြောင့် ပရမတ်ဘုရားရှင်က သူတို့အား မေတ္တာ ဝေးစေပြီ။

၈၉။ သူတို့ထံ၌ ရှိရာကို ဖြောင့်မှန်စေသည့် ကျမ်းတော် တစ်ပါးသည် ပရမတ်ဘုရားရှင်ထံမှ သူတို့ထံသို့ ရောက်လာစဉ်၊ ရှေ့ အလျင်ကပင် ဖုံးကွယ်လေ့ ရှိသောသူတို့အား ဖွင့်ပေးစေလိုကြ၏၊ သို့သော် သူတို့ သိမှတ်ရာ ရောက်လာသော် ၎င်းကို သူတို့ကိုယ်တိုင် ဖုံးကွယ်ကြ၏၊ သို့ဖြစ်၍ ပရမတ်ဘုရားရှင်က ထို ဖုံးကွယ်သူတို့အား မေတ္တာဝေးစေပြီ။ ၉၀။ သူတို့သည် ပရမတ်ဘုရားရှင် ချမှတ်ပေး သည်ကို ဖုံးကွယ်ခြင်း၊ ပရမတ်ဘုရားရှင်က စံချိန်ပြည့် အမှုတော်ဆောင်များအား သိက္ခာပေးခြင်းကို အပြစ်ရှာလျက် သူတို့၏ စရိုက်ကို အမင်္ဂလာဖြင့် ရောင်းစား ခြင်းဖြင့် ကံကြီးသင့်မှု ကံကြီး သင့်ခြင်းကို ဆွဲယူကြပြီ၊ ထို့ကြောင့် ဖုံးကွယ်သူများ အတွက် နိမ့်ကျသော ဝဋ်ကြွေးသည် ရှိနေ၏။

၉၁။ “ပရမတ်ဘုရားရှင် ချမှတ်ပေးရာ၌ ယုံကြည်ကြလော့၊” ဟု ပြောသော အခါ၊ “ကျွန်ုပ်တို့အား ချမှတ်ပေးသည်ကိုသာ ယုံကြည်ပေပြီ၊”ဟု ပြန်ပြောကြ လျက်၊ သူတို့၌ ရှိသည်ကို ဖြောင့်မှန်စေသည့် သစ္စာတရားအား ဖုံးကွယ် ငြင်းဆန်၍ ကွယ်ကာပစ်သော သူတို့အား “သင်တို့သည် ယုံကြည်သူများ ဖြစ်ကြလျှင်- ရှေ့အလျင်က ပရမတ်ဘုရားရှင်၏ သတင်းတော်ဆောင်များကို အဘယ့်ကြောင့် သတ်ခဲ့လေသနည်း၊”ဟု မေးမြန်းလော့။

၉၂။ သင်တို့ထံသို့ မူဆာသည် ရှင်းလင်းချက်များဖြင့် မုချ ရောက်လာပြီ၊ တဖန် သူ့နောက်တွင်မှ သင်တို့သည် နွားငယ်ကို အယူထားလျက် အမိုက်ကောင် များ ဖြစ်ကြပြီ။ ၉၃။ ထို့ပြင် “သင်တို့အပေါ်၌ တောင်တော်ကို မြှောက်စားခဲ့ပြီ၊ ငါ ပေးအပ်ရာ၌ အစွမ်းရှိရှိ အယူမြဲလော့၊ နာယူကြလော့၊” ဟု သင်တို့၏ ကတိခံဝန်ကို ငါ ယူသောအခါ၊” “တပည့်တော်တို့ နားထောင်သော်လည်း အာခံရပါမည်၊”ဟု ပြောကြ၏၊ ထိုသို့ သူတို့၏ ဖုံးကွယ်မှုများကြောင့် ထိုနွားငယ်က သူတို့၏ နှလုံးသွေးကို စုပ်လေပြီ၊ “သင်တို့သည် ယုံကြည်သူများ ဖြစ်ကြလျှင် သင်တို့၏ ယုံကြည်မှုက သင်တို့အား အမင်္ဂလာကို ညွှန်ကြားထားပြီ၊”ဟု ဟောလော့။

၉၄။ “ပရမတ်ဘုရားရှင်၏ ထံ၌ ရှိသော နောက်ဆုံးစွန် ဗိမာန်သည် လူသား အပေါင်း မှလွဲ၍ သင်တို့အတွက် သီးသန့်ဖြစ်သော်၊ သင်တို့သည် ဖြောင့်မှန်သူများ ဖြစ်ကြလျှင် သေလိုသည့်ဇော ရှိကြကုန်၊”ဟု ပြောကြားလော့။ ၉၅။ သူတို့၏ စုံရပ်ခံခဲ့သော လက်ချက်များကြောင့် မည်သည့်ခါမှ သေလိုသည့်ဇော မရှိကြပေ၊ ပရမတ်ဘုရားရှင်သည် အမိုက်ကောင်များကို သိနေတော်မူသော အရှင် ဖြစ်၏။ ၉၆။ သူတို့သည် ရောပြွန်းကိုးကွယ်သော သူများထက်ပင် ဤလောကီအား ဆန္ဒဇော ကပ်နေသော လူသားများ ဖြစ်ကြောင်း သင် တွေ့ရလိမ့်မည်၊ သူတို့ တစ်ယောက် ချင်းစီ နှစ်တစ်ထောင် ဘ၀သံသရာကို ရလိုကြ၏၊ ထိုသို့ ဘ၀သံသရာကို ရငြား သော်လည်း ဝဋ်ကြွေးမှ ဖယ်ရှားခံရမည် မဟုတ်ပေ။ ပရမတ်ဘုရားရှင်သည် သူတို့၏ ကျင့်ကြံသမျှအား မြင်နေသော အရှင် ဖြစ်၏။

၉၇။ ဟောပြောလော့ “ပရမတ်ဉာဏ်စဉ်အား စည်းဖေါက်သူသည် မည်သူ ဖြစ်သနည်း၊” ပရမတ်ဘုရားရှင်၏ ခွင့်ပြုချက်ဖြင့် သင်၏ နှလုံးသား၌ ချမှတ်ပေးသော ထိုအရာသည် ပစ္စုပ္ပာန်များကို ဖြောင့်မှန်စေ၍၊ ယုံကြည်သူများ အတွက် လမ်းညွှန်မှန်နှင့် သတင်းကောင်းပင် ဖြစ်၏။ ၉၈။ မည်သူမဆို ပရမတ် ဘုရားရှင်၊ အရှင်၏ နိမိတ်ဆောင်များ၊ အရှင်၏ ဉာဏ်စဉ်ဆောင်များ၊ ပရမတ် ဉာဏ်စဉ်နှင့် လောကပါလဓမ္မတို့အား စည်းဖေါက်သူ ဖြစ်အံ့- ဧကန်ပင် ပရမတ် ဘုရားရှင်သည် ဖုံးကွယ်သူများအတွက် တန်ပြန် စည်းဖေါက်သူ ဖြစ်၏။

၉၉။ သင့်အား ရှင်းလင်းသော သုတ်ဒေသနာများကို ငါ ချမှတ်ပေးတော် မူပြီ၊ ယုတ်မာသူများသည်သာ ၎င်းကို ဖုံးကွယ်ကြလိမ့်မည်။ ၁၀၀။ ပဋိညာဉ်ပြု ပဋိညာဉ်ထားတိုင်း သူတို့မှ တစ်ဖွဲ့သည် ၎င်းကို စွန့်ပစ်ကြသည် မဟုတ်လော၊ အမှန်မှာ သူတို့မှ အများစုသည် ယုံကြည်မှု မရှိကြပေ။ ၁၀၁။ သူတို့၌ ရှိရာကို ဖြောင့်မှန်စေသည့် ပရမတ်ဘုရားရှင်၏ ထံမှ ဉာဏ်စဉ် ဆောင်တစ်ပါး သူတို့ထံသို့ ရောက်လာစဉ် ကျမ်းပေးခံရသောသူများမှ တစ်ဖွဲ့သည် စွန့်ပစ်လျက်၊ ပရမတ် ဘုရားရှင်၏ ကျမ်းတော်ဟု မသိသယောင် ကျောခိုင်း ကွယ်ကာပစ်ကြ၏။

၁၀၂။ သူတို့သည် ဆိုလိုင်မံ၏ ဩဇာအာဏာကို ကျော်၍ မကောင်းဆိုးဝါး တို့ ရွတ်ဖတ်ရာကိုသာ လိုက်နာကြ၏၊ ဆိုလိုင်မံသည် ဖုံးကွယ်သည် မဟုတ်၊ သို့သော် မကောင်းဆိုးဝါးတို့သည်သာ ဖုံးကွယ်ကြ၏၊ သူတို့သည် ဘေဘီလုံ နိမိတ်ဆောင် နှစ်ဦးဖြစ်သော ဟာရူးတ်နှင့် မာရူးတ်တို့ ထံသို့ ချမှတ်ပေးရာ ဖြစ် သည့် လူသားတို့အား လှည့်စားမှုကို သင်ပေးကြ၏၊ သူတို့က “ကျွန်ုပ်တို့သည် စမ်းသပ်ခြင်းသာ ဖြစ်၏၊ ဖုံးကွယ်ခြင်း မဟုတ်ပါ၊”ဟု မပြောဘဲ တစ်ဦး တစ်ယောက်ကိုမှ သင်မပေးခဲ့ချေ၊ ၎င်းတို့သည် သူတို့ နှစ်ဦး ထံမှ လူသားတို့ စုဖွဲ့မှုကြား ခွဲခြင်းကိုသာ သင်ယူကြ၏၊ သူတို့သည် ပရမတ်ဘုရားရှင်၏ ခွင့်ပြု ချက် မရှိဘဲ တစ်စုံတစ်ယောက်ကိုမှ မနစ်နာ စေနိုင်သော၊ သူတို့ကိုယ်သာ နစ်နာစေ မည့် အကျိုးမရှိရာကို သင်ယူကြလေပြီ၊ ထိုအရာကို ရောင်းဝယ်သူတို့ အတွက် အနာဂါတ် ဖြစ်တည်မှု မရှိကြောင်း သူတို့ မုချ သိကြကုန်၏၊ သူတို့၏ စရိုက်များ ကို အမင်္ဂလာဖြင့် ရောင်းစားကြပြီ၊ သူတို့ သိကြပါလေစ။ ၁၀၃။ အကယ်၍ သူတို့သည် သက်ဝင်ယုံကြည်လျက် စည်းစောင့်ကြလျှင် ပရမတ်ဘုရားရှင်၏ ထံမှ အကျိုးဆက်သည် ပိုကောင်း၏၊ သူတို့ သိကြပါလေစ။

၁၀၄။ အို-ယုံကြည်သောသူတို့ “ကျွန်ုပ်တို့ကို ထိန်းကျောင်းပါ၊”ဟု မပြော ကြနှင့်၊ “ကျွန်ုပ်တို့အား ကြည့်ရှုပါ၊” ဟု ပြောကြလော့၊ ကြားနာကြလော့ ဖုံးကွယ် သူများ အတွက် စူးနစ်နာကျင်သော ဝဋ်ကြွေးသည် ရှိနေ၏။ ၁၀၅။ ကျမ်းစာ ဝိုင်းသား များမှ ဖုံးကွယ်သောသူ နှင့် ရောပြွန်းကိုးကွယ်သူများသည်၊ သင်တို့အား ကံကြမ္မာ ရှင် ထံမှ ချမှတ်ပေးသည့် အကောင်းကို မလိုလားကြပေ၊ ပရမတ်ဘုရားရှင်သည် စံချိန်ပြည့်သူအား ကရုဏာဖြင့် ရွေးကောက်တော်မူ၏၊ ပရမတ်ဘုရားရှင်သည် မဟာ့မဟာ သိက္ခာပေးသော အရှင် ဖြစ်၏။

၁၀၆။ မည်သည့် သုတ်ဒေသနာကို မဆို ငါက ကမည်းထိုးစေသည် ဖြစ်စေ၊ ပယ်ဖျက်စေသည်ဖြစ်စေ ထို့ထက် ပိုကောင်းရာ သို့မဟုတ် ပမာတူရာကို ပေးအပ်တော်မူ၏၊ ဧကန်ပင် ပရမတ်ဘုရားရှင်သည် သဗ္ဗလုံးစုံအား စည်းချိန် ချမှတ်တော်မူကြောင်း သင်တို့ မသိကြလေသလော။ ၁၀၇။ ဧကန်ပင် ပရမတ် ဘုရားရှင်သည် ကောင်းကင်များနှင့် မြေတို့၏ အရှင်သခင် ဖြစ်ကြောင်း သင်တို့ မသိကြသလော၊ ပရမတ်ဘုရားရှင် မှလွဲ၍ မဟာမိတ်၊ ကူညီသူ ဟူ၍ သင်တို့ အတွက် မရှိပေ။ ၁၀၈။ သို့တည်းမဟုတ်၊ သင်တို့ အတွက် ပွင့်ပေါ်သော ဉာဏ်စဉ်ဆောင်အား၊ ရှေ့အလျင်က မူဆာအား တောင်းဆို သကဲ့သို့ တောင်းဆို လိုကြသလော၊ ယုံကြည်ချက်အစား ဖုံးကွယ်ခြင်းဖြင့် လဲလှယ်သောသူ အတွက် မုချပင် ပုံစံချပြီး လမ်းစဉ်မှ လွဲချော်ရလတ္တံ့။

၁၀၉။ ကျမ်းစာဝိုင်းသားများမှ အများစုသည် သူတို့ စရိုက်၏ မနာလိုမှု များကြောင့်- သူတို့အတွက် သစ္စာတရားကို ရှင်းလင်းစေပြီး နောက်မှ သင်တို့အား ယုံကြည်ပြီးနောက်မှ ဖုံးကွယ်သူအဖြစ် ပြန်လှည့်စေလိုကြ၏၊ ပရမတ်ဘုရားရှင်၏ ညွှန်ကြားချက် ပေးရောက်သည့်တိုင် ကျေအေး၍ ဥက္ခာပြုထားလော့၊ ဧကန်ပင် ပရမတ်ဘုရားရှင်သည် သဗ္ဗလုံးစုံအား စည်းချိန်ချမှတ်တော်မူ၏။ ၁၁၀။ ဝတ်ပြု မြဲကြလော့၊ အခွန်ငွေဖြူ ပေးကြလော့။ သင်တို့၏ စရိုက် အတွက် ကောင်းစွာ စုံရပ် ခံခဲ့ခြင်းတို့အား ပရမတ်ဘုရားရှင်၏ ထံ၌ တွေ့ရလတ္တံ့၊ ဧကန်ပင် ပရမတ်ဘုရားရှင် သည် ကျင့်ကြံသမျှကို မြင်နေသော အရှင် ဖြစ်၏။

၁၁၁။ “ရေ၀တီ သို့မဟုတ် ခရစ်ယာန် မဟုတ်သူသည် သုခဘုံသို့ မဝင်ရ၊”ဟု ပြောကြ၏၊ ၎င်းသည် သူတို့၏ ဇောဆန္ဒပေတည်း၊ “သင်တို့သည် ဖြောင့်မှန်သူများ ဖြစ်ကြလျှင် သက်သေပြချက် ယူခဲ့ကြ၊”ဟု ပြောကြားလော့။ ၁၁၂။ အမှန်မှာ ပရမတ်ဘုရားရှင်အား မျက်နှာမူ၍ ငြိမ်းချမ်းရေး ပြုသော- ထိုသုမင်္ဂလာ ပြုသူအတွက် ဆုလဒ်မှာ ကံကြမ္မာရှင်၏ ထံ၌ ရှိနေပြီ၊ သူတို့အား ကြောက်ရွံ့ရစေ မည် မဟုတ်၊ သောကရောက်ရစေမည်လည်း မဟုတ်ချေ။ ၁၁၃။ ရေ၀တီတို့က ခရစ်ယာန်တို့အား “မဟုတ်မဟတ်” ဟု ပြောကြ၍၊ ခရစ်ယာန်တို့ကလည်း ရေ၀တီ တို့ကို “မဟုတ်မဟတ်”ဟု ပြောကြ၏၊ သူတို့သည် ကျမ်းစာကို ရွတ်ဖတ်နေကြ လျက် ဤသို့ အသိမရှိသော သူများ ပြောသည့်ပမာ ပြောဆိုနေကြ၏၊ သို့ဖြစ်၍ ပရမတ်ဘုရားရှင်သည် သူတို့ချင်းကြား ရှိသော ကွဲလွဲချက်များကို ရပ်တည်ရသော နေ့၌ စီရင်ထုံး ချတော်မူမည်။ ၁၁၄။ အရှင်၏ ဂုဏ်တော်များအား သတိရ ရှုမှတ် သော သူများကို ပရမတ်ဘုရားရှင်၏ ဝတ်ကျောင်းတော်မှ ပိတ်ပင်၍၊ သူတို့အား ဖြိုဖျက်ရန် လုံးပန်းနေသူထက် မည်သူက ပို၍ အမိုက်စီးဘိသနည်း၊ သူတို့ ကိုယ်တိုင် စိုးရိမ်ကြီးစွာဖြင့်သာ ဝင်လာသူများ ဖြစ်သင့်၏၊ သူတို့အတွက် လောကီ၌ အရှက်ရခြင်းနှင့် နောင်ဘ၀၌ မဟာ ဝဋ်ကြွေးကြီး ရှိနေ၏။

၁၁၅။ နေထွက်ရာ၊ နေဝင်ရာတိုင်းသည် ပရမတ်ဘုရားရှင်၏ အချုပ် အခြာ၌ ရှိ၏၊ သင်တို့၏ လှည့်ရာ ဘက်တိုင်းသည် ပရမတ်ဘုရားရှင်၏ မျက်မှောက်တော် ဖြစ်၏၊ ဧကန်ပင် ပရမတ်ဘုရားရှင်သည် အသိဉာဏ်တော် ဖြန့်ကျက်ထားသော အရှင် ဖြစ်၏။

၁၁၆။ “ပရမတ်ဘုရားရှင်သည် ကိုယ်ပွား ထားရှိ၏၊” ဟု ပြောကြ၏။ အမှန်မှာ အရှင်သည် ဦးထိပ်ထားရာ ဖြစ်၏၊ မိုးမြေ၌ ရှိသမျှတို့သည် အရှင်၏ အချုပ်အခြာ၌ ရှိ၏၊ ခပ်သိမ်းကုန်သည် အရှင့်အား နာခံနေရ၏။ ၁၁၇။ မိုးမြေတို့၏ မူလအရှင်က အပြီးသတ် ညွှန်ကြားချက် “ဖြစ်”ဟု မိန့်သော် သို့ဖြင့် ဖြစ်လာရ မည်ပင်။

၁၁၈။ အသိ မရှိသော သူများက “ပရမတ်ဘုရားရှင်က ကျွန်ုပ်တို့အား မုက္ခပါတ်တော် သို့မဟုတ် သုတ်ဒေသနာတော် အဘယ်ကြောင့် မပေးသနည်း၊”ဟု ပြောကြ၏၊ သူတို့ မတိုင်မှီ သူများ ပြောသည့် ပမာ ဤအတိုင်းပင် ပြောကြ၏၊၊ သူတို့၏ နှလုံးသားမှာ ဆင်တူနေ၏၊ ဒိဌယုံသော လူမျိုးအတွက် သုတ်ဒေသနာများ ကို ငါ ရှင်းလင်းထားပြီး ဖြစ်၏။ ၁၁၉။ ငါသည် သင့်အား သစ္စာတရားအားဖြင့် သတင်းကောင်းပါးသူ၊ သတိပေးသူအဖြစ် စေစားတော်မူ၏၊ ငရဲမီး ပေါင်းဖေါ်များ နှင့် စပ်လျဉ်း၍ သင့်အား စစ်ကြောမည် မဟုတ်ပေ။

၁၂၀။ ရေ၀တီများ ခရစ်ယာန်များက သူတို့၏ ကျင့်စဉ်ကို မလိုက်နာသ၍ သင့်အား ကျေနပ်မည် မဟုတ်ပေ။ “ပရမတ်ဘုရားရှင်၏ လမ်းညွှန်မှုသည်သာ လမ်းညွှန်မှန် ဖြစ်၏၊”ဟု ဟောပြောလော့၊ သင့်ထံသို့ အသိပညာ ရောက်လာပြီးမှ သူတို့၏ လိုဘများကို လိုက်နာလျှင် ပရမတ်ဘုရားရှင်၏ ထံမှ မဟာမိတ်နှင့် ကူညီသူသည် သင့်အတွက် မရှိပြီ။ ၁၂၁။ ငါ ကျမ်းစာပေးသော သူများသည်၊ ၎င်းကို မှန်မှန်ကန်ကန် ရွတ်ဖတ်ခြင်းဖြင့် ရွတ်ဖတ်ကြသော် ၎င်း၌ ယုံကြည်သူများ ဖြစ်ကြ၏၊ ၎င်းကို ဖုံးကွယ်သူများသည် ဆုံးရှုံးသူများ ဖြစ်ချေပြီ။

၁၂၂။ အို-ဂျူးလူမျိုးတို့ သင်တို့အား ငါ ဂုဏ်ပေးသည့် ဂုဏ်ပုဒ်များကို သတိရကြလော့၊ ငါသည် သင်တို့ကို လောကခပ်သိမ်း အပေါ်၌ သိက္ခာပေးခဲ့ပြီ။ ၁၂၃။ ဉာဉ်တစ်ခုက ဉာဉ်တစ်ခု အတွက် တစ်စုံတစ်ရာ အစားမပေးနိုင်သော၊ တန်ရာ တန်ကြေး အကိုးမပြည့်သော၊ အမျှဝေခြင်း အကျိုး မဖြစ်သော၊ အကူအညီမဲ့ နေ့ကာလ အတွက် စည်းစောင့်ကြလော့။

၁၂၄။ အီဗရာဟီးမ်အား ကံကြမ္မာရှင်က မုက္ခပါတ်တော်ဖြင့် စုံစမ်းသော အခါ သူသည် ပြည့်စုံစေခဲ့၏။ အရှင်က “ငါသည် သင့်အား လူသားတို့၏ ရှေ့ဆောင် အဖြစ် စီစဉ်တော်မူပြီ၊”ဟု မိန့်ဆိုသော်၊ သူက “တပည့်တော်၏ သားမြေးများမှ ကော၊”ဟု ပြန်လျှောက်၏၊ “ငါ့ ပဋိညာဉ်အား အမိုက်ကောင်များ မဆွတ်ခူးနိုင်၊”ဟု မိန့်တော်မူ၏။ ၁၂၅။ ငါသည် အိမ်တော်အား လူသားအပေါင်း အကျိုးနှင့် ယုံကြည် စိတ်ချရာ အဖြစ် စီစဉ်တော်မူ၏၊ အီဗရာဟီးမ်၏ ရပ်တည်ခဲ့သည်အား ဝတ်ပြု သည့်နေရာ အဖြစ် ယူမှတ်ကြလော့၊ ငါသည် အီဗရာဟီးမ်နှင့် အီစ္စမာအီးလ်တို့အား “လှည့်လည်သူ၊ ၀ဇီပိတ်ကျင့်သူ၊ ဦးညွှတ်သူ၊ ဦးချသူတို့အတွက် ငါ၏ အိမ်တော်ကို သန့်စင်စေကြလော့၊”ဟု ပဋိညာဉ်ပြုထား၏။

၁၂၆။ အီဗရာဟီးမ်က “အို-ကံကြမ္မာရှင် ဤမြို့တော်အား မြို့သားများ ယုံကြည်စိတ်ချရရန် စီစဉ်တော်မူပါ၊ ပရမတ်ဘုရားရှင်နှင့် နောက်ဆုံး နေ့ကို ယုံကြည်သူတို့အား သီးနှံရိက္ခာများ ပြည့်စေတော်မူပါ၊”ဟု လျှောက်တင်သော်၊ အရှင်က “ဖုံးကွယ်သူကိုလည်း အနည်းငယ်မျှ ချမ်းမြေ့စေမည်၊ ထို့နောက် အမင်္ဂလာ ပန်းတိုင်ဖြစ်သည့် စစ်မီး ဝဋ်ကြွေးသို့ တွန်းပို့ခံရမည်၊” ဟု မိန့်၏။ ၁၂၇။ အီဗရာဟီးမ်နှင့် အီစ္စမာအီးလ်တို့သည် အိမ်တော်၏ အုတ်မြစ်ကို မြှင့်တင်သော အခါ-

“အို ကံကြမ္မာရှင် တပည့်တော်တို့အား ဆန္ဒပြည့်စေတော်မူပါ၊ အရှင် သည် ကြားနေသော အရှင်၊ သိနေသောအရှင် ဖြစ်ပါ၏၊”- ၁၂၈။ “အို-ကံကြမ္မာရှင် တပည့်တော်တို့အား ငြိမ်းချမ်းရေးပြုသူများ အဖြစ်၊ တပည့်တော်တို့၏ သားမြေး တို့အား ငြိမ်းချမ်းရေးပြုသူ အသိုင်းအဝိုင်းအဖြစ် စီစဉ်ပေးပါ၊ တပည့်တော်တို့အား ဝတ်ဖြည့်နည်းကို ပြသပေးပါ၊ တပည့်တော်တို့အား သင်ပုန်းချေပေးတော်မူပါ၊ အရှင်သည် သင်ပုန်းချေပေးသော၊ ကရုဏာသက်သော အရှင် ဖြစ်ပါ၏၊” ၁၂၉။ “အို-ကံကြမ္မာရှင် သူတို့အား အရှင်၏ သုတ်ဒေသနာများကို ရွတ်ဖတ်ပြရန်၊ ကျမ်းတော် နှင့် စီရင်ထုံးကို သင်ကြားပေးရန်၊ သန့်ရှင်းဖြူစင်စေရန် ဉာဏ်စဉ်ဆောင် တစ်ပါး ကို သူတို့ အထဲမှ ပွင့်ပေါ်စေတော်မူပါ၊ အရှင်သည် ဘုန်းတော်အရှင်၊ ဓမ္မသတ်ရှင် ဖြစ်ပါ၏၊”ဟု လျှောက်ထားကြ၏။

၁၃၀။ စရိုက်ပျက်မိုက်မဲသူသည်သာ အီဗရာဟီးမ်၏ ကျင့်စဉ်တော်ကို ဦးစားမပေး၊ ငါသည် သူ့အား ဤဘ၀၌ ရွေးချယ်၍ နောင်ဘ၀အတွက် ပြုပြင် ပြောင်းလဲသူများ၏ အနက်မှ ဖြစ်စေတော်မူမည်။ ၁၃၁။ သူ့အား ကံကြမ္မာရှင်က “ငြိမ်းချမ်းစေလော့၊”ဟု မိန့်သောအခါ၊ “လောကခပ်သိမ်း ၏ ကံကြမ္မာရှင် အတွက် ငြိမ်းချမ်းရေး ပြုနေကြောင်းပါ၊”ဟု သူ လျှောက်ထား၏။

၁၃၂။ အီဗရာဟီးမ်နှင့် ယာကုဗ်တို့က သားမြေးတို့အား “အို-သားမြေးတို့၊ ပရမတ်ဘုရားရှင်သည် သင်တို့ အတွက် သာသနာတော်ကို ရွေးချယ်ပြီ၊ သင်တို့ သည် ငြိမ်းချမ်းရေးပြုသူ အဖြစ်မှအပ ဘ၀ မပြောင်းကြစေနှင့်၊”ဟု မှာကြား၏။ ၁၃၃။ သို့တည်းမဟုတ် ယာကုဗ်၏ အာယုသင်္ခါရ လွှတ်ချိန်၌ သင်တို့သည် မျက်မြင်သက်သေ ဖြစ်ကြသလော၊ သားမြေးတို့အား “ကျွန်ုပ်၏နောက်၌ မည်သူ့ အား သင်တို့ ကိုးကွယ်ကြမည်နည်း၊”ဟု သူကမေးသော်၊ “ကိုယ်တော်၏ ဘုရားရှင်၊ သင်၏ ဘဘိုးများ ဖြစ်သော အီဗရာဟီးမ်၊ အီစ္စမာအီလ်၊ အီစ္စဟာ့က် တို့၏ တစ်ပါးတည်း ဘုရားရှင်ကိုသာ ကိုးကွယ်ကြပါမည်၊ ကျွန်ုပ်တို့သည် အရှင့် အတွက် ငြိမ်းချမ်းရေးပြုသူများ ဖြစ်ပါ၏၊”ဟု ပြောကြပြီ။ ၁၃၄။ ဤ အသိုင်းအဝိုင်းသည် လွန်ခဲ့လေပြီ၊ သူတို့၏ ကျင့်ဆောင်မှုသည် သူတို့အတွက်၊ သင်တို့၏ ကျင့်ဆောင်မှု သည် သင်တို့ အတွက်ပင် ဖြစ်၏၊ သူတို့၏ ကျင့်ကြံလေ့ရှိရာများကြောင့် သင်တို့ အား စစ်ကြောမည် မဟုတ်ပေ။

၁၃၅။ “လမ်းညွှန်တရားရရန် ရေ၀တီ သို့မဟုတ် ခရစ်ယာန်များ ဖြစ်ကြ လော့၊” ဟု ပြောသည်တို့အား၊ ပြန်ပြောလော့- “အီဗရာဟီးမ်၏ ကျင့်စဉ်သည် ဧကန်ပင် အယူသန့်၏၊ သူသည် ရောပြွန်းကိုးကွယ်သူမှ မဟုတ်ပေ။” ၁၃၆။ “ကျွန်ုပ်တို့သည် ပရမတ်ဘုရားရှင်၊ ကျွန်ုပ်တို့ထံသို့ ချမှတ်ပေးရာ၊ အီဗရာဟီးမ်၊ အီစ္စမာအီလ်၊ အီစ္စဟာ့က်၊ ယာကုဗ်နှင့် လူမျိုးစုများ ထံသို့ ချမှတ်ပေးရာ၊ မူဆာနှင့် ယေရှုတို့ထံသို့ ပေးအပ်ရာနှင့် သတင်းတော်ဆောင်တိုင်းအား ကံကြမ္မာရှင်၏ ထံမှ ပေးအပ်ရာတို့ကို ယုံကြည်ကြ၏၊ ထိုကိုယ်တော်များကြား တစ်ပါးနှင့်တစ်ပါး ခွဲခြားမှု မပြုပါ၊ ကျွန်ုပ်တို့သည် အရှင့်အတွက် ငြိမ်းချမ်းရေးပြုသူများ ဖြစ်ကြ၏၊” ဟု ပြောဦးလော့။

၁၃၇။ သူတို့သည် သင်တို့ယုံကြည် သကဲ့သို့ ယုံကြည်ကြလေလျှင် လမ်းညွှန်တရားကို မုချ ရပေအံ့၊ အကယ်၍ လှည့်သွားကြလေလျှင် ဂိုဏ်းခွဲ သူများမှ ဖြစ်ကြ၏၊ သူတို့နှင့် ပတ်သက်၍ ပရမတ်ဘုရားရှင်သည် လုံလောက် တော်မူ၏၊ အရှင်သည် ကြားနေသော အရှင်၊ သိနေသော အရှင် ဖြစ်၏။ ၁၃၈။ “ပရမတ်ဘုရားရှင်၏ ဓါတ်တော်အား ကူးကြလော့ ဓါတ်တော်ကူးပေးရာ၌ ပရမတ် ဘုရားရှင်ထက် မည်သူက ပို၍တင့်တယ်စေအံ့နည်း၊ ကျွန်ုပ်တို့သည်ကား အရှင့်ကို သာ ကိုးကွယ်သူများ ဖြစ်ကြ၏။”

၁၃၉။ “ပရမတ်ဘုရားရှင်၊”ဟု ဟော၍ ကျွန်ုပ်အား စောကြောကြသလော၊ အရှင်သည် သင်တို့၏ ကံကြမ္မာရှင်၊ ကျွန်ုပ်၏ ကံကြမ္မာရှင် ဖြစ်၏၊ သင်တို့ ကျင့်ကြံမှုသည် သင်တို့အတွက် ကျွန်ုပ် ကျင့်ကြံမှုသည် ကျွန်ုပ် အတွက်ပင် ဖြစ်၏၊ ကျွန်ုပ်တို့သည် အရှင့်ကိုသာ သန့်သန့်ထား ကိုးကွယ်ပါ၏။ ၁၄၀။ “သို့တည်းမဟုတ် အီးဗရာဟီးမ်၊ အီစ္စမာအီးလ်၊ အီစ္စဟာ့က်၊ ယာကုဗ်နှင့် လူမျိုးစုတို့သည် ရေ၀တီ သို့မဟုတ် ခရစ်ယာန်များ ဖြစ်ကြ၏ဟု ပြောကြသလော၊ သို့တည်းမဟုတ် သင်တို့သည် ပရမတ်ဘုရားရှင်ထက် ပို၍ သိကြကုန်သလော၊”ဟု မေးမြန်းလော့။ ပရမတ်ဘုရားရှင်၏ သက်သေတော် သူ့ထံ၌ ရှိလျက် ထိန်ဝှက်ထားသူထက် မည်သူက ပို၍ အမိုက်စီးဘိ သနည်း၊ ပရမတ်ဘုရားရှင်သည် ကျင့်ကြံသမျှကို မေ့လျှော့ထားသည် မဟုတ်ပေ။

၁၄၁။ ဤအသိုင်းအဝိုင်းသည် လွန်ခဲ့လေပြီ၊ သူတို့၏ ကျင့်ဆောင်မှုသည် သူတို့အတွက်၊ သင်တို့၏ ကျင့်ဆောင်မှုသည် သင်တို့ အတွက်ပင် ဖြစ်၏၊ သူတို့၏ ကျင့်ကြံလေ့ ရှိရာများကြောင့် သင်တို့အား စစ်ကြောမည် မဟုတ်ပေ။

၁၄၂။ လူသားတို့အနက် တုံးအသူများက “သူတို့၏ ရှိနေခဲ့သော ရှေ့ရှုမှုကို ဘယ်အရာက ဘက်လှည့်စေသနည်း၊” ဟု မေးကြလတ္တံ့၊ ဟောပြောလော့ “နေထွက်ရာ နေဝင်ရာတိုင်းသည် ပရမတ်ဘုရားရှင်၏ အချုပ်အခြာ၌ ရှိ၏၊ စံချိန်ပြည့်သူအား မြဲမြံတည်တံ့သော လမ်းစဉ်သို့ ညွှန်တော်မူသတည်း။”

၁၄၃။ ငါသည် သင်တို့အား ဤသို့ တော်ဝင် အသိုင်းအဝိုင်း အဖြစ် စီစဉ်ပေးခြင်းမှာ သင်တို့သည် လူသားတို့ အပေါ်၌ သက်သေ ဖြစ်အံ့သောငှာ၊ ဉာဏ်စဉ်ဆောင်သည် သင်တို့ အပေါ်၌ သက်သေ ဖြစ်အံ့သောငှာ ဖြစ်၏။ သင်တို့၏ ရှိနေခဲ့သော ရှေ့ရှုခဲ့မှုကို ငါ စီစဉ်ခဲ့သည် မဟုတ်၊ သို့သော် မည်သူသည် ဉာဏ်စဉ်ဆောင်အား လိုက်နာ၍ မည်သူသည် သူ့နိဂုံးသို့ ဦးလှည့်သည်ကို သိနိုင်ရန်သာ ဖြစ်၏၊ အမှန်သော် ပရမတ်ဘုရားရှင်၏ လမ်းညွှန်ခံရသောသူ အတွက်မှ အပ ဝန်ကြီးလှပေ၏။ ပရမတ်ဘုရားရှင်သည် သင်တို့၏ ယုံကြည်ချက် ကို အလဟသ မဖြစ်စေပေ။ ပရမတ်ဘုရားရှင်သည် လူသားတို့ အပေါ်၌ ညှာတာသော အရှင်၊ ကြင်နာသော အရှင် ဖြစ်၏။

၁၄၄။ ကောင်းကင်ယံသို့ သင် မျက်နှာမူ ဦးလှည့်နေသည်ကို ငါ မြင်တော် မူ၏၊ သို့ဖြင့် သင်စိတ်ကျေနပ်သည့် ရှေ့ရှုမှုသို့ ဘက်လှည့် စေတော်မူပြီ၊ “ဘေးမဲ့ ဝတ်ကျောင်းတော် ဘက်သို့ မျက်နှာမူ လှည့်လော့၊ သင်တို့သည် မည်သည့်အရပ်၌ ရှိစေ ထိုဘက်သို့ မျက်နှာမူ လှည့်လော့၊ ကျမ်းစာ ပေးခံရသော သူတို့က ၎င်းသည် ကံကြမ္မာရှင်၏ ထံမှ သစ္စာတရား ဖြစ်သည်ဟု ဧကန် သိကြလတ္တံ့၊” ပရမတ် ဘုရားရှင်သည် ကျင့်ကြံ လေသမျှကို မေ့လျှော့ထားသည် မဟုတ်ပေ။ ၁၄၅။ ကျမ်း ပေးခံရသူတို့ ထံသို့ ရှိသမျှ သုတ်ဒေသနာများကို သင် ယူဆောင်ခဲ့သော်လည်း သင်၏ ရှေ့ရှုမှုသို့ သူတို့ လိုက်နာသူများ မဟုတ်ချေ၊ သင်လည်း သူတို့၏ ရှေ့ရှုမှုကို လိုက်နာသူ မဟုတ်ပေ။ သူတို့မှ အချို့၏ ရှေ့ရှုမှုကို အချို့က လိုက်နာ ကြမည် မဟုတ်ပေ၊ သင့်ထံသို့ အသိပညာ ရောက်လာပြီးမှ သူတို့၏ လိုဘသို့ လိုက်လေလျှင် သင်သည် အမိုက်ကောင်များမှ ဖြစ်ချေပြီ။

၁၄၆။ ကျမ်းပေးခံရသူတို့သည် သူတို့၏ သားမြေးများကို သိမှတ် သကဲ့သို့ သူ့အား သိမှတ်သင့်၏၊ သူတို့မှ တစ်ဖွဲ့သည် အမှန်တရားကို သိနေလျက်နှင့် ဧကန် ထိန်ဝှက်နေကြ၏။ ၁၄၇။ အမှန်တရားသည် သင်၏ ကံကြမ္မာရှင်ထံမှ ဖြစ်၏၊ သို့ဖြစ်၍ သင်တို့သည် အချင်းများသူတို့မှ မဖြစ်သင့်ပေ။

၁၄၈။ ဦးတည် မျက်မှောက်ပြုမှု ကိုယ်စီ ရှိကြ၏၊ သို့ဖြစ်ရာ ကောင်းမှုများ၌ ပြိုင်ဆိုင်ကြလော့၊ သင်တို့သည် မည်သည့် နေရာ၌ ရှိစေ ပရမတ်ဘုရားရှင်သည် သင်တို့အား အတူစုရာ ရှိစေပြီ။ ဧကန်ပင် ပရမတ်ဘုရားရှင်သည် သဗ္ဗလုံးစုံအား စည်းချိန်ချမှတ်တော်မူ၏။ ၁၄၉။ မည်သည့် နေရာသို့ ထွက်ခွာသည်ဖြစ်စေ သင်တို့သည် ဘေးမဲ့ ဝတ်ကျောင်းတော် ဘက်သို့ ရှေ့ရှု၍ လှည့်လော့၊ မှတ်သား လော့ အမှန်တရားသည် ကံကြမ္မာရှင်၏ထံမှ ဖြစ်၏၊ ပရမတ်ဘုရားရှင်သည် ကျင့်ကြံလေသမျှကို မေ့လျော့ထားသည် မဟုတ်ပေ။ ၁၅၀။ မည်သည့်နေရာသို့ ထွက်ခွာသည် ဖြစ်စေ သင်တို့သည် ဘေးမဲ့ ဝတ်ကျောင်းတော်သို့ မျက်နှာမူ လှည့်လော့၊ မည်သည့် နေရာ၌ ရှိသည်ဖြစ်စေ လူသားတို့ အကျိုး ရှိစေရန် ထိုဘက်သို့ မျက်နှာမူ လှည့်လော့၊ သူတို့မှ မိုက်ကြေးခွဲသော သူများမှ လွဲ၍ သင်တို့ကို မစောကြောနိုင်ရန် ဖြစ်၏၊ သူတို့အား မကြောက်ကြနှင့် ငါ့ကိုသာ ကြောက်ကြလော့၊ သင်တို့သည် လမ်းညွှန်မှန်ကို ရကောင်းအံ့ငှာ သင်တို့အား ဂုဏ်မင်္ဂလာဖြင့် ပြည့်စုံစေတော်မူပြီ။

၁၅၁။ သင်တို့၏အနက်မှ ဉာဏ်စဉ်ဆောင် တစ်ပါးအား စေစား သကဲ့သို့ပင်၊ သူသည် ငါ၏ သုတ်ဒေသနာများကို သင်တို့အား ရွတ်ဖတ်ပြ၏၊ သင်တို့အား သန့်ရှင်း ဖြူစင်စေ၏၊ ကျမ်းတော်နှင့် စီရင်ထုံးကို သင်ကြားပေး၏၊ သင်တို့ မသိခဲ့သည်များကို သင်ပေး၏။ ၁၅၂။ ငါ့ကိုသာ အာရုံပြုလော့၊ ငါသည် သင်တို့အား အာရုံပြုတော်မူမည်၊ ကျေးဇူးသိကြကုန်လော့၊ မဖုံးကွယ်ကြကုန်နှင့်။

၁၅၃။ အို-ယုံကြည်သောသူတို့၊ ဝတ်ပြုခြင်း၊ သည်းခံခြင်း များဖြင့် ပံ့ပိုးမှုကို ရှာကြလော့၊ ဧကန်ပင် ပရမတ်ဘုရားရှင်သည် ခန္တီပါရမီရှင်တို့နှင့် အတူ ရှိတော်မူ၏။ ၁၅၄။ ပရမတ်ဘုရားရှင်၏ လမ်းစဉ်တော်၌ လုပ်ကြံခံရသူများအား သေကြပြီဟု မပြောဆိုနှင့်၊ သူတို့သည် ရှင်နေလျက်ပင်၊ သို့သော် သင်တို့ သတိမမူနိုင်ကြပေ။ ၁၅၅။ ငါသည် သင်တို့အား ကြောက်ရွံမှု၊ ငတ်မွတ်မှု၊ ဥစ္စာပစ္စည်း ဉာဉ်စရိုက် သီးနှံများ ယုတ်လျော့မှု စသောအရာ များဖြင့် စုံစမ်းတော်မူမည်၊ ခန္တီပါရမီရှင်တို့အား သတင်းကောင်းပါးလော့။ ၁၅၆။ သူတို့အား ထိခိုက်မှုတစ်ခု ထိခိုက်စေသောအခါ၊ သူတို့က “ကျွန်ုပ်တို့သည် ပရမတ်ဘုရားရှင် အတွက်ပင်၊ အရှင့်ထံသို့သာ ကျွန်ုပ်တို့ ဦးလှည့်ရ မည်သာတည်း၊”ဟု ရင့်ကျူးကြ၏။ ၁၅၇။ သူတို့အပေါ်သို့ ကံကြမ္မာရှင်၏ မေတ္တာ၊ ကရုဏာတော်သည် သက်၏၊ သူတို့သည် လမ်းညွှန်ခံရသူများ ဖြစ်၏။

၁၅၈။ ဧကန်ပင် ဆွဖာရ်နှင့် မရ်ဝါတောင်တို့သည် ပရမတ်ဘုရားရှင် သတ်မှတ်သည့် သတိမူစေရာများမှ ဖြစ်၏၊ မည်သူမဆို ဝတ်ကျောင်းတော်၌ ကံဆောင်ပရိဝါ့သ်ပြုသော်၊ သို့မဟုတ် ဂါယာပြုသော် ထိုတောင်တို့အား လှည့် လည်ခြင်းကြောင့် အပြစ်မတင်ထိုက်ပေ၊ စိတ်ပြတ်စွာဖြင့် အကောင်းလုပ်သူ အတွက်၊ ဧကန်ပင် ပရမတ်ဘုရားရှင်သည် ကျေးဇူးပြန်သော အရှင်၊ သိနေသော အရှင် ဖြစ်၏။ ၁၅၉။ ရှင်းလင်းသော လမ်းညွှန်များကို ငါ ချမှတ်ပေးပြီးနောက်၊ လူသားတို့ အတွက် ကျမ်းစာမှ ရှင်းလင်းချက်များကို ထိန်ဝှက်ထားသော သူတို့၏ အပေါ်သို့ ပရမတ်ဘုရားရှင်က မေတ္တာဝေးစေပြီ။ မေတ္တာမဲ့ခွင့်ရှိသူတို့၏ မေတ္တာ ဝေးစေပြီ။ ၁၆၀။ ခဝါချ၊ ပြုပြင်၊ ရှင်းရှင်း လင်းလင်းရှိသော သူတို့အပေါ် သင်ပုန်း ချေပေးလတ္တံ့၊၊ ငါသည် သင်ပုန်းချေ ပေးသော အရှင် အကြင်နာရှင် ဖြစ်၏။

၁၆၁။ ဖုံးကွယ်သောသူ၊ ထိုဖုံးသွယ်သူ အဖြစ်နှင့်ပင် ဘ၀ပြောင်း၏ ထိုသူ တို့အား ပရမတ်ဘုရားရှင်၊ နိမိတ်ဆောင်များနှင့် လူသား အပေါင်း၏ မေတ္တာဝေး စေခြင်း- ၁၆၂။-၌ ကာလမဲ့ ဖြစ်၏၊ သူတို့အတွက် ဝဋ်ကြွေးမှာ ပေါ့ပါးစေမည် မဟုတ်၊ စောင့်ကြည့်ခွင့် ပေးမည်လည်း မဟုတ်ပေ။

၁၆၃။ သင်တို့၏ဘုရားရှင်မှာ တစ်ဆူတည်းသာ ဖြစ်၏၊ ထိုကရုဏာရှင် အကြင်နာရှင်မှ အပ အခြား ဘုရား ဟူ၍ မရှိပြီ။ ၁၆၄။ မိုးမြေများကို ဖြစ်တည် စေခြင်း၊ နေ့ညများကို အလှည့်ကျ ဖြစ်စေခြင်း၊ လူသားတို့ အကျိုးငှာ လှေ သင်္ဘောများကို ပင်လယ်ပြင်၌ ရွက်လွှင့်စေခြင်း၊ သေနေပြီးသော မြေကမ္ဘာကို မိုးတိမ်တိုက်မှ ပရမတ်ဘုရားရှင်က ချပေးသည့် ရေဖြင့် ပြန်ရှင်စေလျက် သတ္တဝါ မျိုးစုံ ပျံ့ပွားစေခြင်း၊ လေလမ်းကြောင်းများအား ဘက်ပြန်စေခြင်းနှင့် မိုးနှင့်မြေ ကြား ရှိသမျှအား အသုံးခံ ဖြစ်စေခြင်းတို့မှာ အတွေးအခေါ် ရှိသော လူမျိုးအတွက် သုတ်ဒေသနာ များပင် ဖြစ်ချေ၏။

၁၆၅။ လူသားတို့အနက် ပရမတ်ဘုရားရှင် မှလွဲ၍ ဂုဏ်တုပြိုင်လျက် အယူထားသူတို့ ရှိ၏၊ သူတို့အား ပရမတ်ဘုရားရှင်အား နှစ်သက်သလို နှစ်သက် နေကြ၏၊ ယုံကြည်သော သူတို့သည်ကား ပရမတ်ဘုရားရှင်၌ နှစ်သက်မှုမှာ ပြတ်သားလှချေ၏၊ ဝဋ်ကြွေးကို မြင်တွေ့ရသောအခါ၊ အစွမ်းသတ္တိ အားလုံးသည် ပရမတ်ဘုရားရှင်၌သာ ရှိ၏၊ ပရမတ်ဘုရားရှင်သည် ပြင်းထန်စွာ ဝဋ်ဒဏ်သင့်စေ ၏ဟု မိုက်ကြေးခွဲသောသူတို့ မြင်တွေ့ရလတ္တံ့။ ၁၆၆။ ကိုးကွယ်ခံများသည် တပည့်ဒကာတို့မှ ကင်းရှင်းကုန်အံ့၊ ဝဋ်ကြွေးကို မြင်တွေ့ရကုန်အံ့၊ ထိုအခါ သူတို့၏ နှောင်ဖွဲ့မှုများ ပြတ်တောက်သွားလတ္တံ့။ ၁၆၇။ တပည့်ဒကာများက “အကယ်၍သာ ကျွန်ုပ်တို့ အဘို့ အလှည့်ပြန်ရလျှင် ကျွန်ုပ်တို့အား ကင်းရှင်းခဲ့သလို သူတို့ကို ကင်းရှင်းပစ်ကြမည်၊”ဟု ပြောဆိုလတ္တံ့၊ ပရမတ်ဘုရားရှင်သည် သူတို့၏ ကျင့်ကြံ ခဲ့ရာမှာ သူတို့အတွက် ကြေကွဲစရာ ဖြစ်ကြောင်း မြင်တွေ့စေမည်၊ သူတို့သည် အပူမီးမှ ထွက်ကြရမည့်သူများ မဟုတ်ပေ။

၁၆၈။ အို၊ လူသားအပေါင်းတို့- မြေကမ္ဘာ၌ တရားဝင် စင်ကြယ်ရာကို စားသုံးကြလော့၊ မကောင်းဆိုးဝါး၏၊ ခြေရာ နောက်သို့ မလိုက်နာကြနှင့်၊ သူသည် သင်တို့အတွက် ရှင်းလင်းထင်ရှားစွာ စည်းဖေါက်သူ ဖြစ်၏။ ၁၆၉။ သူသည် သင်တို့အား အကုသိုလ်မှု ကိုယ်ကျင့်ပျက်မှုနှင့် ပရမတ်ဘုရားရှင် အပေါ် သင်တို့ မသိသည်များကို ပြောဆိုရန် ညွှန်ကြားလတ္တံ့။

၁၇၀။ သူတို့အား “ပရမတ်ဘုရားရှင် ချမှတ်ပေးသည်ကို လိုက်နာကြ လော့၊”ဟု ပြောသောအခါ၊ “ကျွန်ုပ်တို့ တွေ့ရှိရာ မိရိုးဖလာကို လိုက်နာပါပြီ၊”ဟု ပြန်ပြောကြ၏၊ အမှန်မှာ သူတို့၏ ဘဘိုးများသည် အတွေးအခေါ် တစ်စုံတစ်ရာ မရှိ၊ လမ်းညွှန်မှန်၌ မရှိချေ။ ၁၇၁။ ဖုံးကွယ်သောသူများ အတွက် ဥပမာကား ဖိတ်ကြားသံ အော်ခေါ်သံမှ အပ ကြားနိုင်စွမ်း မရှိသော အော်ဟောက်ရသောသူ ပမာ ဖြစ်၏၊ ပင်းသူ၊ အသူ၊ ကန်းသူ ထိုသူတို့သည် တွေးခေါ်နိုင်ကြမည် မဟုတ် ချေ။

၁၇၂။ အို-ယုံကြည်သောသူတို့၊ သင်တို့အား ငါ ပေးရာ ရိက္ခာမှ စင်ကြယ် ရာကို စားသုံးကြလော့၊ သင်တို့သည် ပရမတ်ဘုရားရှင်ကိုသာ ကိုးကွယ်ကြလျှင် အရှင့်အား ကျေးဇူးသိကြကုန်လော့။ ၁၇၃။ အရှင် တားမြစ်သည်မှာ အသေသား၊ သွေး၊ ဝက်သား၊ ပရမတ်ဘုရားရှင် မှကင်း၍ အခြား အရာကို တိုင်တည် လှီးသတ်သော အသားတို့ ဖြစ်၏၊ အပြစ်ရှာခြင်း ကင်းလျက် စည်းမဖေါက်လိုဘဲ တွန်းပို့ခံရသူ အတွက် အကုသိုလ် မဟုတ်ချေ၊ ပရမတ်ဘုရားရှင်သည် လွတ်ငြိမ်း စေသော အရှင်၊ အကြင်နာရှင် ဖြစ်တော်မူ၏။

၁၇၄။ ပရမတ်ဘုရားရှင် ချမှတ်ပေးသည့် ကျမ်းတော်မှ တစ်စိတ်တစ်ပိုင်း ကို ထိန်ဝှက်လျက် ၎င်းကို တန်ဘိုးချ ရောင်းစားသော သူတို့သည် သူတို့၏ ဝမ်းတွင်းသို့ မီးကိုသာ စားမြိုခြင်းမည်၏၊ ရပ်တည်ရသော နေ့၌ ပရမတ်ဘုရားရှင် က ဗျာဒိတ်တော်ပေးမည် မဟုတ် သန့်ရှင်းဖြူစင်စေမည်လည်း မဟုတ်ပေ။ သူတို့အတွက် စူးနစ်သော ဝဋ်ကြွေးသည် ရှိ၏။ ၁၇၅။ လမ်းလွဲအား လမ်းညွှန်မှန်ကို ဝဋ်ကြွေးအား လွတ်ငြိမ်းခွင့်ဖြင့် ရောင်းဝယ်သော သူတို့သည် မည်သို့ မည်ပုံ အပူမီး၌ ကြံကြံ ခံနိုင်အံ့နည်း။

၁၇၆။ ဤသည်မှာ ပရမတ်ဘုရားရှင်သည် သစ္စာတရားအားဖြင့် ကျမ်းတော် အား ချမှတ်ပေးသောကြောင့်တည်း၊ ဧကန်ပင် ကျမ်းတော်၌ သဘောကွဲသော သူတို့သည် ဂိုဏ်းခွဲ နောက်ကျန်ရစ်ကြ၏။ ၁၇၇။ အရှေ့၊ အနောက်တို့အား ရှေ့ရှု မျက်နှာလှည့်ခြင်းဖြင့် သင်တို့ အတွက် ကောင်းမှု မမည်သေး။ သို့ရာတွင် ကောင်းမှု ဟူသည်မှာ- ပရမတ်ဘုရားရှင်၊ နောင်ဘ၀ နေ့ကာလ၊ နိမိတ်ဆောင်များ၊ ကျမ်းတော်နှင့် သတင်းတော်ဆောင်များကို ယုံကြည်သူ၊ မိမိ နှစ်သက်သော ဥစ္စာ ပစ္စည်းကို ဆွေမျိုးနီးစပ်၊ မိဘမဲ့၊ နွမ်းပါးသူ၊ ခရီးသည်၊ တောင်းခံသူနှင့် ကျွန်စနစ် ဖျက်သိမ်းရေး အတွက် ပေးကမ်းသူ၊ ဝတ်ပြု မြဲ၍ အခွန်ငွေဖြူ ပေးသူ၊ ပဋိညာဉ်ပြု သောအခါ ပဋိညာဉ်၌ ပြီးပြည့်စေသူ၊ အမင်္ဂလာ နစ်နာရခြင်းနှင့် အမင်္ဂလာ ခေတ်ဆိုး၌ ခန္တီပါရမီရှိသူတို့သည်သာ သီလရှိသူ မည်၏။ သူတို့သည်ကား ဖြောင့်မှန်သောသူများ ဖြစ်ကြ၏၊ သူတို့သည်ကား စည်းစောင့်သူများ ဖြစ်ကြ၏။

၁၇၈။ အို- ယုံကြည်သောသူတို့၊ လူသတ်မှုများ အတွက် ဖေါ်ပြမှုမှာ လူလွတ်အတွက် လူလွတ်၊ ဝန်ထမ်း အတွက် ဝန်ထမ်း၊ လိင်မ အတွက် လိင်မဟူ၍ သင်တို့အား ပြဌာန်းပြီ။ သို့သော် ခံရသူ၏ သားချင်းများက လျော်ကြေး တစ်စုံ တစ်ရာဖြင့် ကျေအေးရန် ကမ်းလှမ်းလျှင် အသိအမှတ်ပြု လိုက်နာ၍ သူ့ကို တင့်တယ်စွာ ဆက်ဆံရမည်။ ဤသည် ကံကြမ္မာရှင်၏ ထံမှ ပေါ့ပါးစေခြင်းနှင့် ကရုဏာသက်ခြင်းပင် ဖြစ်၏၊ မည်သူမဆို တဖန် စည်းဖေါက်သူ ဖြစ်လျှင် စူးနစ် သော ဝဋ်ကြွေးသည် ရှိ၏။ ၁၇၉။ ထိုဖေါ်ပြမှု၌ သင်တို့ အတွက် အသက်ဆက်ခွင့် ရှိ၏။ အို- သဘောပေါက်နိုင်စွမ်း ရှိသူတို့၊ သင်တို့ စည်းစောင့်အံ့ငှာ ဖြစ်၏။

၁၈၀။ သင်တို့မှ တစ်စုံတစ်ဦးသည် အနိစ္စရောက်ချိန်တန်လျှင်၊ မွေးမိဘ များ ဆွေမျိုးနီးစပ်များ အတွက် ကောင်းမွန်စွာ အသိအမှတ်ပြု သေတမ်းစာ ချန်ထားခဲ့ရန် သင်တို့အား ပြဌာန်းသည်မှာ- စည်းစောင့်သူတို့ အတွက် သစ္စာ ဖြစ်၏။ ၁၈၁။ မည်သူမဆို ၎င်းကို ကြားနာပြီးမှ လွှဲပြောင်းခဲ့သော် ထိုလွှဲပြောင်း သောသူများ အပေါ်၌သာ အပြစ် ရှိ၏၊ ဧကန်ပင် ပရမတ်ဘုရားရှင်သည် ကြားနေ သော အရှင် သိနေသော အရှင် ဖြစ်ပေ၏။ ၁၈၂။ သို့သော် သေတမ်းစာ ရေးသူ၏ မှားယွင်းမှု သို့မဟုတ် ပြစ်မှုကို စိုးရိမ်၍ သူတို့၏ကြား ပြုပြင်လိုသောသူသည် အပြစ် မရှိချေ၊ ဧကန်ပင် ပရမတ်ဘုရားရှင်သည် လွတ်ငြိမ်းစေသော အရှင် အကြင်နာရှင် ဖြစ်၏။

၁၈၃။ အို- ယုံကြည်သောသူတို့၊ သင်တို့ ရှေ့အလျင် သူများအား ပြဌာန်း သကဲ့သို့ သင်တို့အပေါ်၌ ဥပုသ်စောင့်ရန် ပြဌာန်းတော်မူပြီ၊ သင်တို့ စည်းစောင့် အံ့ငှာ ဖြစ်၏။ ၁၈၄။ တွက်ချက်ထားသော ရက်များပင်။ အကြင်သူသည် ဖျားနာနေ သို့မဟုတ် လမ်းခရီး၌ ရှိနေလျှင် နောင်၌ တွက်ချက် ရက် ဖြည့်ရမည်၊ အင်အား ရှိသောသူ၏ အပေါ်၌- နွမ်းပါးသူအား ကျွေးမွေး၍ အစားထိုးနိုင်၏၊ စိတ်ပြတ် စွာဖြင့် အကောင်း လုပ်သူ၏- ထိုကောင်းမှုသည် သူ့အတွက်ပင် ဖြစ်၏၊ ဥပုသ် စောင့်ခြင်းသည် ပိုကောင်း၏ သင်တို့ သိကြပါလေစ။

၁၈၅။ ရမ်ဿွန်လ၊ ထိုလ၌ လူသားတို့အား လမ်းညွှန်ချက်၊ လမ်းညွှန် တော်မှ ရှင်းလင်းချက်များနှင့် ခွဲခြမ်းစိတ်ဖြာဖွင့်ဆိုသည့် ကုရ်အာန်အား ချမှတ်ပေး တော်မူ၏၊ သင်တို့ အနက် ထိုလအား မျက်မှောက်သက်သေ ရှိသူသည် ဥပုသ် စောင့်ရမည်၊ အကြင်သူသည် ဖျားနာနေ သို့မဟုတ် လမ်းခရီး၌ ရှိနေလျှင် နောင်၌ တွက်ချက် ရက်ဖြည့်ရမည်၊ ပရမတ်ဘုရားရှင်သည် သင်တို့အား လွယ်ကူစေလို၍ သင်တို့ အတွက် ခက်ခဲစေလိုတော် မမူခြင်းမှာ သင်တို့သည် တွက်ချက် ဖြည့်ဆီးနိုင် ရန်၊ ပရမတ်ဘုရားရှင်- ကြီးကျယ်ကြောင်းကို မှတ်နိုင်ရန်၊ သင်တို့ လမ်းညွှန်မှန် ရနိုင်ရန်နှင့် ကျေးဇူးသိတတ်အံ့ငှာ ဖြစ်၏။

၁၈၆။ ငါနှင့် ပတ်သက်၍ ငါ၏ အမှုတော်ဆောင်ထံ၌ သင်တို့ မေးမြန်း ကြပြီ၊ ငါသည်ကား နီးကပ်စွာရှိ၏၊ ငါ့အား တသ၍ တသ ဆုတောင်းသူ၏ တသခြင်းကို ငါ တုန့်ပြန်တော်မူ၏၊ သူတို့သည်လည်း ဖြောင့်မတ်အံ့ငှာ ငါ့အား ယုံကြည်မှုဖြင့် တုန့်ပြန်စေလော့။

၁၈၇။ ဥပုသ်ညများ၌ သင်တို့၏ အမျိုးသမီးများနှင့် မေထုံပြုခြင်းသည် သင်တို့ အဘို့ တရားဝင်၏၊ သူတို့သည် သင်တို့အတွက် ဆင်ယင်စရာ၊ သင်တို့သည် သူတို့အတွက် ဆင်ယင်စရာပင် ဖြစ်၏၊ သင်တို့၏ဉာဉ်၌ သစ္စာမခိုင် ဖြစ်ခဲ့ရသည်ကို ပရမတ်ဘုရားရှင် သိတော်မူ၍ သင်တို့အား သင်ပုန်းချေတော်မူပြီ၊ သင်တို့အား ကျေအေးတော်မူပြီ၊ သို့ဖြစ်၍ သူမတို့နှင့် ပေါင်းသင်းနိုင်၏၊ သင်တို့ အတွက် ပရမတ်ဘုရားရှင် ပြဌာန်းထားသည်ကို ရှာဖွေကြလော့၊ အဖြူမျှင်သည် အမည်း မျှင်မှ ရှင်းလင်းစေသည့် ဖြာထွက်ချိန် အထိ စားကြသောက်ကြကုန်လော့၊ ထို့နောက် ညသို့တိုင် ဥပုသ်သီလ ပြီးပြည့်စေလော့၊ သင်တို့သည် ဝတ်ကျောင်း တော်များ၌ ၀ဇီပိတ်ကျင့်နေစဉ် သူမတို့နှင့် မပေါင်းသင်းရ၊ ယင်းသည် ပရမတ် ဘုရားရှင်၏ စည်မျဉ်း ဖြစ်၍ ထိုအပါးသို့ မချည်းကပ်ကြနှင့်၊ ပရမတ်ဘုရားရှင် သည် လူသားတို့ အတွက် သုတ်ဒေသနာများကို ဤကဲ့သို့ ရှင်းလင်းထားခြင်းမှာ သူတို့ စည်းစောင့်နိုင်အံ့ငှာ ဖြစ်၏။

၁၈၈။ သင်တို့ချင်းကြား ဥစ္စာပစ္စည်းများကို အမှားပြုလျက် မစားသုံး ကြနှင့်၊ လူသားတို့၏ ဥစ္စာ ခွဲတမ်းဟု သိနေပါလျက် အပြစ် သင့်စွာ စားသုံးရန် စီရင်ထုံးချသူတို့ထံ မဖားကြနှင့်။

၁၈၉။ လဆန်းပက္ခများအကြောင်း မေးကြသူတို့အား၊ ပြောလော့ “၎င်းတို့ သည် လူသားတို့အတွက် ပြက္ခဒိန် ပြဌာန်းရန်နှင့် ကံဆောင်ပရိဝါ့သ် အတွက် ဖြစ်၏” “အိမ်များကို နောက်မှ ချဉ်းကပ်ခြင်းသည် ကောင်းမှု မဟုတ်ချေ၊ သို့သော် စည်းစောင့်ခြင်းသည်သာ ကောင်းမှု ဖြစ်၏၊ အိမ်များကို တံခါးပေါက်များမှ ဝင်ကြ လော့၊ အောင်မြင်ပေါက်မြောက်အံ့ငှာ ပရမတ်ဘုရားရှင်အား စည်းစောင့်ကြလော့။”

၁၉၀။ သင်တို့အား တိုက်ခိုက်သော သူများကို ပရမတ်ဘုရားရှင်၏ လမ်းစဉ်တော် ခုခံတိုက်ကြလော့၊ သို့သော် စည်းမဖေါက်ကြနှင့်၊ ပရမတ်ဘုရားရှင် သည် စည်းဖေါက်သူများအား နှစ်သက်တော် မမူချေ။ ၁၉၁။ သူတို့အား ထိပ်ဆိုင်တိုး ရာ နေရာတိုင်း၌ ခုခံတိုက်ကြလော့၊ သင်တို့အား နှင်ထုတ်သော နေရာများမှ သူတို့အား နှင်ထုတ်ကြလော့၊ သွေးတိုးစမ်းခြင်းသည် သတ်ဖြတ်ခြင်းထက် ပို၍ ပြင်းထန်၏၊ ဘေးမဲ့ဝတ်ကျောင်းတော်၏ အပါး၌ သင်တို့အား မတိုက်ခိုက်သ၍ သူတို့အား မတိုက်ခိုက်ကြနှင့်၊ သို့သော် သူတို့က တိုက်ခိုက်လာလျှင် သူတို့အား ခုခံတိုက်ခိုက်ကြလော့၊ ဤသည်မှာ ဖုံးကွယ်သူများ အတွက် အစားပေးခြင်း ဖြစ်၏။ ၁၉၂။ သို့သော် သူတို့ ဘက်က ရပ်စဲကြလျှင်၊ ဧကန်ပင် ပရမတ်ဘုရားရှင် သည် လွတ်ငြိမ်းစေသော အရှင် အကြင်နာရှင် ဖြစ်၏။

၁၉၃။ သွေးတိုးစမ်းခြင်း မရှိတော့သည်ထိ သူတို့အား ခုခံတိုက်ခိုက်ကြ လော့၊ သာသနာသည် ပရမတ်ဘုရားရှင် အတွက်သာ ဖြစ်သင့်၏၊ သို့သော် သူတို့ ဘက်က ရပ်စဲကြသော်၊ အမိုက်ကောင်များ အပေါ် မှလွဲ၍ စည်းမဖေါက်ကြနှင့်။ ၁၉၄။ ဘေးမဲ့လများသည် ဘေးမဲ့လများနှင့် အခြားသော ဘေးမဲ့ပေးထားသည့် ဖေါ်ပြမှုများ အတွက် ဖြစ်၏၊ သင်တို့ အပေါ် စည်းဖေါက် သူအား သင်တို့ကို စည်းဖေါက်မှုနှင့် အလားတူ စည်းဖေါက်နိုင်၏၊ ပရမတ်ဘုရားရှင်အား စည်းစောင့် ကြကုန်လော့၊ သိကြကုန်လော့ ပရမတ်ဘုရားရှင်သည် စည်းစောင့်သူများနှင့် အတူ ရှိတော်မူ၏။ ၁၉၅။ ပရမတ်ဘုရားရှင်၏ လမ်းစဉ်၌ သုံးစွဲကြလော့၊ သင်တို့၏ လက်များကြောင့် တိမ်ကောမှု ဆီသို့ မဆုံတွေ့စေနှင့်၊ သုမင်္ဂလာပြုကြလော့၊ ဧကန်ပင် ပရမတ်ဘုရားရှင်သည် သုမင်္ဂလာ ပြုသူများအား နှစ်သက်တော်မူ၏။

၁၉၆။ ကံဆောင်ပရိဝါ့သ်နှင့် ဂါယာပြုခြင်းကို ပရမတ်ဘုရားရှင် အတွက် ပြီးပြည့်စေလော့၊ သို့သော် သင်တို့ ထိန်းချုပ်ခံထားရလျှင် လွယ်ကူသော အလှု ဝတ္ထုကို ပို့လော့၊ အလှုဝတ္ထုများ ဘောင်ဝင်ရာသို့ မဆိုက်မြိုက်မှီ ဦးခေါင်းများကို မရိတ်ကြနှင့်၊ သင်တို့မှ ဖျားနာသူ၊ ဦးခေါင်း ထိခိုက်ထား သူတို့ ဖြစ်လျှင် ဥပုသ် စောင့်ခြင်း၊ အလှုပေးခြင်း၊ ဝတ်ဖြည့်ခြင်းများဖြင့် အစားထိုးနိုင်၏၊ စိတ်ချမ်းမြေ့ စွာ၊ ဂါယာပြုရင်း ပရိဝါ့သ်ပြုသောအခါ သင်တို့အတွက် လွယ်ကူသော ဝတ္ထုကို လှုလော့၊ ကိုယ်တွေ့ မဖြစ်နိုင် သူသည် ပရိဝါ့သ် အတွင်း ဥပုသ် သုံးရက်၊ ပြန်လာ သောအခါ ခုနှစ်ရက် စုပေါင်း ဆယ်ရက်ပြည့် စောင့်ရမည်၊ ၎င်းသည် ဘေးမဲ့ ကျောင်းတော်၏ အသင့်နေ နယ်ခံသား မဟုတ်သူတို့ အတွက် ဖြစ်၏၊ ပရမတ် ဘုရားရှင်အား စည်းစောင့်ကြလော့၊ သိကြကုန်လော့ ပရမတ်ဘုရားရှင်သည် ပြတ် သားစွာ ချုပ်ကိုင်နိုင်တော်မူ၏။